Որդիաբար խնդրում եմ՝ տեր կանգնեք ձեր որոշմանը, փոխանցեք ձեր կերտած անկախ հայրենիքը մեզ. Էդգար Ղազարյան
Երևանում մեկնարկել ՀՀ առաջին գումարման Գերագույն խորհրդի խորհրդանշական նիստը՝ նվիրված Հայաստանի անկախության հռչակագրի 32-րդ ամյակին։
Նախաձեռնության հեղինակը «Համախմբում» շարժման անդամ, ՀՀ նախկին դեսպան Էդգար Ղազարյանն է, որը ԳԽ առաջին գումարման պատգամավոր Ֆերդինանդ Ղազարյանի որդին է։
Նիստին մասնակցում են Գերախույն խորհրդի պատգամավորներ, հասարակական, քաղաքական գործիչներ։
«Այսօր մենք կանգնած են ցավալի իրողության առաջ՝ նկատում ենք վտանգներ հայոց անկախ պետականության կորստի։ Ինձ, ոչ միայն որպես ձեր որոշման շահառու ՀՀ քաղաքացու, այլ նաև ձեր գործընկերոջ՝ Առաջին գումարման Գերագույն խորհրդի պատգամավոր Ֆերդինանդ Ղազարյանի որդու, անհանգստությունը բերել է մի խնդրանքի, որպեսզի դուք այսօր հավաքվեք միասին:
Ես այդ նախաձեռնությունը հանդես չէի բերի, եթե ողջ լիներ Ֆերդինանդ Ղազարյանը, բայց ողջ է իմ որդի Ֆերդինանդ Ղազարյանը, և Ձեզ որդիաբար խնդրում եմ, որ փոխարինեք իմ հայրիկին, և տեր կանգնեք ձեր որոշմանը, փոխանցեք ձեր կերտած անկախ հայրենիքը մեզ, օգնեք մեզ դիմակայելու այս փորձությանը, որը դժվար է ասել, թե որ կողմերից է պատուհասել մեր ժողովրդին, պետությանը և հայրենիքին, որպեսզի ես էլ հնարավորություն ունենամ այն փոխանցել իմ որդուն` Ֆերդինանդ Ղազարյանին»,- ասաց Էդգար Ղազարյանը՝ դիմելով ԳԽ պատգամավորներին։
Նրա խոսքով՝ իր այս նախաձեռնության մեջ քաղաքական բովանդակություն չկա։
«Այսօր պետք է իջեցնել բոլոր դրոշները, գետնին դնել բոլորիս շահերը և բարձրացնել միայն մեկ դրոշ՝ ՀՀ պետական դրոշը, և առաջնորդվել միայն մեկ շահով՝ ՀՀ պետական շահով»,- նշեց նա։
Էդգար Ղազարյանը նաև հայտնեց, որ նիստի կազմակերպչական աշխատանքներում լուրջ դժվարություններ են ունեցել, դահլիճներ չեն տրամադրել, բացի այդ, միջոցառման անցկացման համար հրաժարվել են տրամադրել Մելիք Ադամյան փողոցում գտնվող նիստերի դահլիճը, որտեղ էլ ընդունվել էր Անկախության հռչակագիրը։
«Ամեն գնով փորձում են անհարմարություններ ստեղծել»,- ասաց նա։
Էդգար Ղազարյանը նշեց նաև, որ նիստն այսօր պետք է վարեր առաջին գումարման Գերագույն խորհրդի նախագահ Լևոն Տեր–Պետրոսյանը։ «Ես երեկ հանդիպում եմ խնդրել առաջին նախագահից, որպեսզի անձամբ նրան փոխանցեմ հրավերն ու գաղափարը։ Ցավոք, չի կայացել այդ հանդիպումը»,- ընդգծեց նա։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
