Ձեր վստահելի աղբյուրը

Հասարակական-քաղաքական գործիչ Էդգար Ղազարյանը,որն այսօր Հանրապետության հրապարակում անցկացրեց հանրահավաք՝ Անակախության հռչակագրի օրը Նիկոլ Փաշինյանի հրաժարականի պահանջով, ազդարարեց հանրահավաքի պաշտոնական հատվածի ավարտի մասին։ Այնուհետև նա  անդրադարձավ հետագա քայլերին՝ նշելով, որ բոլոր գործողությունները լինելու են օրինական։

«Ներկա պահին այս հանցախմբին իշխանությունից վռնդելու երեք օրինական ճանապարհ գոյություն ունի։ Այսօր մենք հավաքվել են գործադրելու դրանցից միայն մեկը՝ վարչապետի հրաժարականը։ ՀՀ Սահամանադրությունն իրավունք է տալիս ցանկացած պաշտոնյայի, այդ թվում՝ վարչապետին, ցանկացած պահին ներկայացնել հրաժարական և լքել պաշտոնը»,- ասաց նա։

Ղազարյանը հիշեցրեց, որ դեռ 2021 թ․-ին Նիկոլ Փաշինյանի հրաժարականի պահանջով  հայտարարությամբ են  հանդես եկել ՀՀ ԶՈՒ 40 գեներալներ, սպաներ, ԳԱԱ-ն, մտավորականներ, կուսակցություններ  ու այլ հասարակական, քաղաքական գործիչներ, սակայն Փաշինյանը հրաժարականի փոխարեն անցկացրեց ընտրությունների իմիտացիա։

«Նա զավթել է այդ իշխանությունն ապօրինաբար և նենգ կերպով այդ իշխանությունը ծառայեցնում է հայ ժողովրդի թշնամիների շահերին»,- ասաց նա։

Ղազարյանը նաև ասաց, որ նպատակ ունի գնալ Կառավարության շենք և հանդիպել Նիկոլ Փաշինյանին։

«Ես հիմա հանդիպում եմ խնդրում մի  վարչապետից, որը փողոցային իր պայքարի ժամանակ հանդիպում է ունեցել Հանրապետության հրապարակում, ցուցարարների մասնակցությամբ, ուղիղ եթերում հանրապետության նախագահ Արմեն Սարգսյանի հետ։  Ես հանդիպում եմ խնդրում մի վարչապետի հետ,որի մինչ վարչապետ ընտրվելը, հանդիպում է եղել Երևանի հյուրանոցներից մեկում, իր նախընտրած ձևաչափով՝ լրագրողների ներկայացությամբ, Սերժ Սարգսյանի հետ։Հիմա ուզում եմ հասկանալ, այդ մարդը կհանդիպի  այսքան մարդու հետ, թող ասի իր նախընտրած վայրը, միակ իմ պայմանը՝ լրատվամիջոցների ներկայությունն է, որպեսզի ցանկացած մարդ լսի և՛ ինձ, և՛ իրեն։ Վստահ կարող է լինել, որ ես իրեն չեմ ծեծի, ես իմ կյանքում դեռ մարդու ծեծած չկամ, չգիտեմ դա ոնց են անում, անգամ ֆիզիկապես այդքան ուժեղ չեմ։ Բայց ամեն դեպքում, եթե վախենում է մեր հեռավորությունը կարող է լինել 30 մետր։ Ոնց ուզում է, ինձ խոսք է պետք»,- իր ելլույթում ընդգծեց նա։

Ղազարյանը հայտարարեց, որ գնում է Կառավարության շենք և ոչ ոք չպետք է նրան ուղեկցի, քանի որ շենքը շրջափակելու մտադրություն չունեն։

Կառավարության շենքի մոտ Ղազարյանին դիմավորեց անվտանգության աշխատակիցը։ Ղազարյանը տեղեկացրելժց, որ մի քանի օր առաջ գրավոր դիմել է Փաշինյանի հետ հանդիպման համար, սակայն ոչ մի պատասխան չի ստացել, այդ թվում՝ մերժում։

Մի քանի րոպե սպասելուց հետո, անվտանգության աշխատակիցը Ղազարյանին պատասխանեց․

«Աշխատանքային ժամ չէ և պատասխանը, որը ստացել ենք շենքի անվտանգության լիազոր մարմնից, այն է, որ մարդ չկա և չի կարող ընդունելություն կարզմակերպել կամ հարցերի պատասխանել։ Հետևաբար պետք է սպասել ,որ Ձեր նամակին պատասխանեն»։

Ղազարյանը նաև փորձեց ճշտել, թե Նիկոլ Փաշինյանը շենքում է,թե՝ ոչ,սակայն պատասխան այդպես էլ չստացավ։