Ձեր վստահելի աղբյուրը

«2022թվականի մարտի 24-ին մենք որպես նվիրատվություն «Զանգեզուրի պղնձամոլիբդենային կոմբինատ»-ից ստացել ենք ևս 6.8 տոկոս։ Այդ ժամանակ այդ նվիրատվությունը մենք ընդունել ենք գաղտնի որոշմամբ»,-հայտարարեց Նիկոլ Փաշինյանը կառավարության այսօրվա նիստում։

Նրա խոսքով, որոշումը չհրապարակելու խնդրանքը եղել է տնտեսվարողինը։

«Մեր կողմից որևէ գաղտնիություն չկա, իրենց կողմից գաղտնիության անհրաժեշտությունը վերացել է։ Եվ մենք հիմա այս բաժնամասը նույնպես հանձնում ենք  Հայաստանի պետական հետաքրքրությունների ֆոնդ» փակ բաժնետիրական ընկերության հավատարմագրային կառավարմանը»,-ասաց Փաշինյանը։

Մարտի 24-ի որոշումից հետո, պաշտոնական վիճակագրության համաձայն. «Զանգեզուրի պղնձամոլիբդենային կոմբինատ»-ում Հայաստանի կառավարությունն ունի 21.875 տոկոս բաժնեմաս։

«Սա շատ կարևոր իրադարձություն է, կարծում եմ։ Ուզում եմ ընդգծել, որ նման նախընտրական խոստմամբ ես հանդես եմ եկել 2021 թվականին՝ Կապանում նախընտրական քարոզչության ժամանակ։ Ուրախ եմ արձանագրել, որ այս նախընտրական խոստումը ևս ի կատար է ածված։ Հույս ունեմ, որ այս որոշումը կնպաստի ոլորտի թափանցիկությանը, պետական եկամուտների գեներամնաը, մեր երկրի զարգացմանը։ Մենք նշանակել են ֆինանսական հսկիչ, փորձում ենք ամեն ինչ անել մեր գործընկերների հետ մաքսիմալ թափանցիկ դարձնենք ընկերությունը, դրա գործունեությունը։ Ուրախ եմ արձանագրել, որ լավ գործընկերային հարաբերություններ են հաստատված, հույս ունեմ, որ այդ ոգով կշարունակենք»,-ասաց Փաշինյանը։

Կառավարության պաշտոնական էջում հրապարակված իրավական ակտի նախագծի համաձայն, Հայաստանի Հանրապետությունը որպես նվիրատվություն «ԱՄՓ» հոլդինգ սահմանափակ պատասխանատվությամբ ընկերությունից ստացել է «Զանգեզուրի պղնձամոլիբդենային կոմբինատ» փակ բաժնետիրական ընկերությունում սեփականության իրավունքով «ԱՄՓ» հոլդինգ սահմանափակ պատասխանատվությամբ ընկերությանը պատկանող 188,947 (հարյուր ութսունութ հազար ինը հարյուր քառասունյոթ) հատ հասարակ (սովորական) բաժնետոմսեր (որոնք կազմում են «Զանգեզուրի պղնձամոլիբդենային կոմբինատ» փակ բաժնետիրական ընկերության (այսուհետ՝ Ընկերություն) բաժնետոմսերի ընդհանուր քանակի 6,875 տոկոսը), որոնց կառավարման լիազորությունը վերապահվել է ՀՀ վարչապետի աշխատակազմին։

Փոխվարչապետ Մհեր Գրիգորյանն էլ հավելեց, որ մոյւս բաժնետերն էլ թափանցիկ գնումների կողմնակից է, ըստ այդմ նկատում են հարկային բազայի մեծացում, գնային փոփոխություններ, ինչն էլ ազդում է ինքնարժեքների վրա։

Հիշեցնենք, որ 2021թ. սեպտեմբերի 30-ին կառավարությունը «Զանգեզուրի պղնձամոլիբդենային կոմբինատ» փակ բաժնետիրական ընկերությունից որպես նվիրատվություն ստացել էր բաժնետոմսերի 15 տոկոսը։ Սրա կառավարումը նույնպես հանձնվել է ԱՆԻՖ-ին։

Այս գործարքի թափանցիկության վերաբերյալ բազմաթիվ հարցադրումներ, հրապարակումներ եղան։

Ինչևէ, կառավարության այսօրվա նիստում միաձայն որոշվեց, որ գաղտնի որոշմամբ նվեր ստացած ու Հայաստանի Հանրապետության սեփականությունը հանդիսացող 6,875 տոկոս բաժնետոմսերով հավաստված իրավունքները հանձնվի «Հայաստանի պետական հետաքրքրությունների ֆոնդ» փակ բաժնետիրական ընկերության հավատարմագրային կառավարմանը, ինչպես նշվում է նախագծի հիմնավորման մեջ, «բաժնետոմսերի կառավարման արդյունավետությունը երաշխավորելու նպատակով»։
Կից հավելվածով ներկայացվում է պայմանագրի ձևը, որտեղ մասնավորապես նշվում է.

«Պայմանագիրն ուժի մեջ է մտնում երկկողմ կնքման պահից և գործում է տասը տարի ժամկետով։ Եթե կողմերից որևէ մեկը մյուս կողմից պայմանագրի ժամկետը լրանալուց երեսուն օր առաջ չի ծանուցում պայմանագրի դադարեցման մասին, ապա պայմանագիրը համարվում է երկարաձգված նույն ժամկետով:
Սույն պայմանագիրը կարող է վաղաժամկետ դադարեցվել կողմերի համաձայնությամբ»։