Ձեր վստահելի աղբյուրը

Ուկրաինայի նկատմամբ ռազմական գործողությունների մեկնարկից՝ այս տարվա փետրվարից ի վեր «Ժողովրդի ձայնը» ակումբն ուսումնասիրում է Հայաստանում Ռուսաստանի նկատմամբ տրամադրությունները։

Հայելի ակումբում  «Ժողովրդի ձայն»-ի փորձագետ Արման Ղուկասյանն ասաց՝  մեր տարածաշրջանում շահերի լուրջ բախում է տեղի ունենում Ռուսաստանի ու Արևմուտքի միջև։

«Հաշվի առնելով, թե ինչ ախորժակ ունեն Ադրբեջանն ու Թուրքիան այս տարածաշրջանում, բնականաբար, հակառուսական տրամադրությունների տարածումն ունի հստակ պատճառներ։ Երբ Ուկրաինայում Ռուսաստանը սկսեց գործողությունները, տարբեր երկրներում ակտիվացան հակառուսական ուժերը, գործակալները։ Հիմնականում դա տեղի ունեցավ այն երկրներում, որտեղ Ռուսաստանն ունի կենսական աշխարհքաղաքական շահեր։ Այս առումով Հայաստանը լիդերներից մեկն է, այստեղ տեղի են ունեցել տասնյակ հակառուսական պիկետներ, ակցիաներ, թեկուզ դրանք բազմամարդ չէին, բայց տեղեկատվական մակարդակում, ակտիվության առումով գործի դրվեց հատուկ գործակալական ցանց, որը տարիներ շարունակ աճեցվել է արևմուտքի կողմից»,-ասաց Ղուկասյանն ու վկայակոչեց ակումբի անցկացրած  «Հայ-ռուսական հարաբերությունների շուրջ տեղեկատվական մանիպուլյացիաներ Ուկրաինայում հատուկ ռազմական գործողության ֆոնին» խորագրով  ուսումնասիրության արդյունքները։

Ղուկասյանը, հակառուսական տրամադրությունների գործում ակտիվ քաղաքական ուժերի, գործիչների անուններ նշեց.

««Ազգային ժողովրդավարական բևեռ», «Եվրոպական կուսակցություն», Ստյոպա Սաֆարյան, Դանիել Իոաննիսյանը, Արթուր Սաքունց, Լևոն Բարսեղյան, Հովսեփ Խուրշուդյան, Ստեփան Գրիգորյան։ Նրանց հայտարարություններից ու գործողություններից տպավորություն է, որ այդ ամենն ուղղորդվում է մեկ կետից, բոլորս գիտենք, որ նրանք ֆինանսավորվում են արևմուտքից։ Մեր երկրում ստեղծում են հակառուսական տրամադրություններ, որը Հայաստանին որևէ դրական բան բերել չի կարող»։

Ղուկասյանի ու ակումբի մյուս անդամների ուսումնասիրությունը ներառում է նաև տեղեկություն, ըստ որի՝ փետրվարի 27-ին Երևանի կենտրոնում Տարաս Շևչենկոյի արձանի մոտ տեղի ունեցած ակցիային մասնակցել են ՀՀ-ում Ուկրաինայի դեսպանատան աշխատակիցներ։

«Ակցիան տեղի ունեցավ Եվրոպական Հայաստան» և «Ազգային-ժողովրդական բևեռ» (ԱԺԲ) քաղաքական միավորումների ներկայացուցիչները, ՀՀ-ում ուկրաինական համայնքի ներկայացուցիչները և այլ ակտիվիստներ: Ակցիան կազմակերպել էր Հայաստանում Ուկրաինայի դեսպանատունը և զարմանալի է, որ Ուկրաինայի դեսպանատունը քաղաքական ուժերի հետ համատեղ անցկացնում է քաղաքական ակցիա արևմտյան երկրների դրոշների ներքո, երբ դա հակասում է դիվանագիտական էթիկային և դիվանագիտական ծառայությանը ընդհանրապես»,- ասաց նա՝ հիշեցնելով, որ ակցիան ունեցել է հստակ աշխարհքաղաքական բովանդակություն։

Բանախոսը հիշեց՝ Ռուսաստանի ԱԳ նախարար Լավրովի այցի օրը Հանրային հեռուսատընկերություն որպես հյուր էր հրավիրել արևմտամետ քաղաքական և հասարակական գործիչ Արման Բաբաջանյանին։

«Նա ողջ եթերը նվիրեց հակառուսական տրամադրություններ սերմանալուն։ Պատահական չէ, որ դա արվեց հենց Լավրովի այցի օրը։ Կան օդում կախված լուրեր, որ  Հանրային հեռուստատեսությունը գտնվում է որոշ արևմտյան դեսպանատների ուշադրության կենտրոնում, նույնիսկ կորդինացման շրջանակում»,-ասաց նա։

Նա ցավ հայտնեց, որ «Սուրմալու» առևտրի կենտրոնում տեղի ունեցած պայթյունն էլ օգտագործվեց հակառուսական տրամադրությունների տարածման նպատակով, մասնավորապես հիշատակեց ԱԺԲ երկու անդամների՝ Հայկ Մարտիրոսյանիու Սամվել Ասլիկյանի գրառումները, ինչին հետևեց  Հայաստանում ՌԴ դեսպանատունը բողոքի նոտա հղեց Հայաստանի ԱԳՆ-ին։

«Ակնհայտ է, որ վերոնշյալ հակառուսական ուժերը որոշ առումով վերահսկվում են նաև հայաստանյան իշխանության շրջանակների կողմից։ Ինչո՞ւ է այդպես, կա երկու պատճառ, 2018-ին Նիկոլ Փաշինյանը եկել է իշխանության գործակալական ցանցի քաղհասարակության ակտիվ մասնակցության արդյունքում, մյուս պատճառն Արցախում ստեղծված իրավիճակն է, գիտեք, այսօր հանձնվում է Բերձորը, Աղավնոն։ Նիկոլ Փաշինյանը, հասկանալով, որ իր վարկանիշն ընկնում է, սլաքներն ուղղում է դեպի ռուս խաղաղապահներ։ Բայց սա մեզ լավ տեղ չի տանելու։ Ես ասում եմ՝ արևմուտքը նպատակ ունի տարածաշրջանից դուրս բերել ռուս խաղաղապահներին, չեզոքացնել Հարավային Կովկասում ռուսական շահերը, հետևաբար այս ուժերը ջուր են լցնում Թուրքիայի ու Ադրբեջանի ջրաղացին»,- ասաց նա։

Արման Ղուկասյանը համարում է, որ Հարավային Կովկասում ռուսական ազդեցության այլընտրանքն այսօր կարող է լինել միայն թուրքական տիրապետությունը։

«Եթե ասում են՝ ռուս խաղաղապահները պետք է դուրս բերվեն Արցախից, ապա պետք է հասարակությունը գիտակցի, որ դրա այլընտրանքը թուրքերն են։ Կարծում եմ, որ այս առումով իշխանությունները պետք է խելքը գլուխը հավաքեն։ Հիմա մենք պետք է ավելի լուրջ ու խոհեմ լինենք»,-ասաց նա։