Ձեր վստահելի աղբյուրը

«Ավետիք Չալաբյանի նկատմամբ քրեական գործը հարուցվել է ապօրինի ձայնագրության հիման վրա։ Մենք ընդհանուր իրավասության դատարանում հիմնավորել ենք, որ նշված ձայնագրությունն ապօրինի է»,- վերաքննիչ քրեական դատարանի դռնբաց նիստում հայտարարեց Չալաբյանի պաշտպանը։

Նա մանրամասնեց, եթե ձայնագրությունը կատարել է  պետությունը, ապա պետք է լինի դատարանի որոշում, իսկ եթե կատարվել է որոշակի սուբյեկտների կողմից, պետք է պահպանված լինեն Վճռաբեկ դատարանի նախադեպային որոշմամբ սահմանված ընթացակարգերը, որոնք այս պարագայում չեն պահպանվել։

«Հարգելի՛ դատարան, մենք գործ ունենք ապօրինի մեղադրանքի հետ, օրենքի խախտմամբ առաջադրված մեղադրանքի հետ, նման պայմաններում այդ գործը դատարան հասցնելու հետ»,-ասաց պաշտպանը՝ նշելով, որ իրենց ներկայացրած հիմնավորումներն ընդհանուր իրավասության դատարանում քննարկման առարկա չեն դարձել։

Նիստում Չալաբյանի պաշտպանական խումբը բողոքարկում էր նրա խափանման միջոցի՝ կալանքի  վերաբերյալ որոշումը։ Նախագահող դատավորը Ռուզաննա Բարսեղյանն է։ Նիստին մասնակցում էր նաև Ավետիք Չալաբյանը։

Պաշտպանն ասաց՝  գործում առկա փաստական տվյալներում չկա մի ապացույց, որով հավաստվի, որ պարոն Չալաբյանի կողմից գումարի մասին առաջարկ հնչել է, նման ապացույց չկա նաև ցուցմունքներում։

«Սա հանցակազմի կարևոր բաղադրիչներից մեկն է՝ օբյեկտիվ կողմի դրսևորումը, որն ամբողջությամբ բացակայում է։  Այս պայմաններում անձը շարունակում է գտնվել անազատության մեջ»,-ասաց պաշտպանը՝ ընդգծելով, որ կալանավորման հիմքեր չկան։

Պաշտպանական խմբի մյուս անդամ՝ Վարազդատ Հարությունյանը դատարանին հիշեցրեց, որ բազմաթիվ քաղաքական, հասարակական, մտավորական գործիչներ, իրավաբաններ, նախկին փոխվարչապետ,  կոչ են արել ազատ արձակել Չալաբյանին, մարդիկ, որոնք հեղինակություն ու բարձր դիրք ունեն, որոնք իրավաբաններ են կրթում։

Նա հարցրե՞ց, միթե այս մարդիկ չեն կարող երաշխավորել Չալաբյանի պատճաշ վարքագիծը, երբ ոչ պատճաշ վարքագծի վերաբերյալ դատավար Մնացական Մարտիրոսյանի որոշման մեջ գոնե 0.1 տոկոս հիշատակում չկա։

«Ուրեմն ո՞րն է պատճառաբանությունը»,-ասաց Հարությունյանը։

Նա հիշեցրեց, անգամ մեղադրող դատախազը դեմ չի եղել, որ Չալաբյանի նկատմամբ խափանման այլ միջոց կիրառել, քան գրավն է՝ հաշվի առնելով, որ ազատության մեջ գտնվելիս Չալաբյանը ոչ պատշաճ վարք չի ցուցաբերել։

Հարությունյանն ասաց՝ միջնորդել են դատարանին կիրառել գրավ։

Պաշտպան Արթուր Հարությունյանն էլ միացավ գործընկերների միջնորդությունների, խնդրեց բավարարել։

Ավետիք Չալաբյանն էլ իր խոսքում նշեց, որ բոլոր իրավաբաններն իր հետ զրույցում պնդում էին՝ նույն գործով երկրորդ անգամ կալանավորելու հիմքեր չկան։

«Մենք ստացանք այս որոշումը, որը կայացվել է երկու ժամում, ինչը վկայում է այն մասին, որ այն կազմված է եղել, ու դատավորին չի հետաքրքրում ոչ մեղադրող կողմի, ոչ պաշտպանական կողմի փաստարկները։ Պատրաստի որոշում է եղել, որի մեջ ոչ մի տեղ պատճառաբանություն չկա, չկա հղում օրենքին, փաստական հանգամանքներին, միայն սուբյեկտիվ ենթադրություններ են ու դատողություններ։ Իմ ակնկալիքն այն է, որ վերաքննիչ դատարանը կվերականգնի Հայաստանի տարածքում Քրեադատավարական օրենսգրքի գործողությունը, երբ օրենքի պահանջը դատավորի կողմից չի փոխվի 180 աստիճանով»,-ասաց Չալաբյանը։

Մեղադրող կողմն ասաց՝ դեռ օգոստոսի 23-ին դատախազությունն արտահայտել է իր դիրքորոշումը Չալաբյանի նկատմամբ խափանման միջոց ընտրելու հարցի վերաբերյալ, մեղադրանքի կողմի դիրքորոշման փոփոխություն տեղի չի ունեցել։

«Դատախազությունը գտնում է, որ այլընտրանքային խափանման միջոցը՝ գրավը կամ անձնական երաշխավարությունը կարող են ապահովել վերջինիս պատշաճ վարքագիծը»,-ասաց դատախազը։

Դատական նիստը հետաձգվեց, դատավորն ասաց, պատճառը ծանրաբեռնվածությունն է։ Այն տեղի կունենա օգոստոսի 30-ին՝ երեքշաբթի օրը։