Եղեգնաձորի մի խումբ բնակիչներ պահանջում են առ ոչինչ համարել «Մետալ Գոլդ» ՍՊԸ-ի կազմած արձանագրությունը և վերականգնել իրենց խախտված իրավունքները
Եղեգնաձոր խոշորացված համայնքի մի խումբ բնակիչներ հայտարարություն են տարածել, որում ասվում է․
«Վայոց ձորի մարզի Եղեգնաձոր խոշորացված համայնքի մի խումբ բնակիչներ նամակով դիմել են Նիկոլ Փաշինյանին՝ բարձրաձայնելով իրենց ապրելու ու արարելու սահմանադրական իրավունքների խախտման մասին և պահանջելով առ ոչինչ համարել օգոստոսի 18-ին Եղեգնաձոր համայնքի Գլաձոր բնակավայրում «Մետալ Գոլդ» ՍՊԸ-ի կողմից նախաձեռնած հանրային քննարկումից հետո կազմված ոչ իրավաչափ արձանագրությունը: Նամակի կրկնօրինակն ուղարկվել է Տարածքային կառավարման և ենթակառուցվածքների նախարար Գնել Սանոսյանին, Շրջակա միջավայրի նախարար Հակոբ Սիմիդյանին, Ազգային անվտանգության ծառայության պետ Արմեն Աբազյանին, ՀՀ գլխավոր դատախազ Արթուր Դավթյանին, ՀՀ ոստիկանության պետ Վահե Ղազարյանին, Վայոց ձորի մարզպետ Արարատ Գրիգորյանին և Եղեգնաձոր խոշորացված համայնքի համայնքապետ Դավիթ Հարությունյանին:
Նամակում նշված է. «2022թ. օգոստոսի 18-ին՝ ժամը 18:00-ին, Վայոց ձոր մարզի Եղեգնաձոր խոշորացված համայնքի համայնքապետ Դավիթ Հարությունյանի կողմից հայտարարվել էր հանրային լսում՝ «ՄԵՏԱԼ ԳՈԼԴ» ՍՊԸ-ի կողմից Շրջակա միջավայրի նախարարության կողմից չհաստատված ՀՕ-110-Ն Շրջակա միջավայրի վրա ազդեցության գնահատման և փորձաքննության մասին ՀՀ օրենքի պահանջներին հակասող հայտի քննարկում: Հանրային լսումը սկսեց 18:30-ին, համայնքապետարանի կողմից լիազորված փոխքաղաքապետ Վարդան Ավագյանը, չներկայացնելով համայնքապետի կողմից լիազորագիր հանրային լսումը կազմակերպելու և անցկացնելու վերաբերյալ, հայտարարեց. «Սուրմալուի աղետալի դեպքերի կապակցությամբ ՀՀ Կառավարությունը օգոստոսի 17-ին և 18-ին Հայաստանի Հանրապետության ողջ տարածքում հայտարարվել է լռության և սգո օրեր: Հաշվի առնելով վերը նշվածը՝ հայտարարում եմ չեղարկել հանրային լսումը, ես չեմ կառավարելու, եթե դուք ցանկանում եք շարունակել հանրային լսումը, իմ փոխարեն թողնում եմ պարոն Օրդոյանին»,- չներկայացնելով Եղեգնաձորի խոշորացված համայնքի ղեկավարի կողմից գրավոր լիազորագիր, որից հետո պարոն Ավագյանը լքեց հանրային լսման տարածքը, քիչ անց հրապարակից հեռացավ նաև պարոն Օրդոյանը։
Հանրային լսումը կազմակերպելու ղեկավարի բացակայության պատճառով ամբոխը դարձավ անկառավարելի, հնչում էին վիրավորանքներ, համատարած աղմուկ:
Ելնելով իրավիճակից՝ մենք՝ բոլորս, հեռացանք տարածքից, մտածելով, որ օրենքով սահմանված կարգով կհայտարարվի նոր հանրային լսում: Օգոստոսի 19-ին տեղեկանում ենք, որ մեր կողմից տարածքը լքելուց հետո՝ ժամը 20:00-ի սահմաններում, փոխքաղաքապետ Վարդան Ավագյանը մեզ անհասկանալի պատճառներով ճնշման տակ վերադարձել է և շարունակել է հանրային լսումը, որտեղ ներկա են եղել միայն հանքի շահագործմանը կողմ մարդիկ՝ թվով 100 հոգի, մի քանի լրագրողներ և ընդդիմադիր թիմից թվով 10 հոգի։ Մթության, խավարի մեջ, չպահպանելով հանրային միջոցառումներ անցկացնելու տարրական պայմաններ՝ մասնակիցների նստելու հնարավորություն, բարձրախոս, լուսավորություն, փոշու, աղմուկի, փոխադարձ վիրավորանքների, բացահայտ ճնշման պայմաններում անցկացրել են ոչ իրավաչափ հանրային լսում, ինքնուրույն կազմել են արձանագրություն, կատարելով կեղծ ստորագրահավաք, անընթեռնելի, կրկնվող անուներով, չներառելով ստորագրողների անձնական տվյալներ, որով հնարավոր չէ ճշտել ստորագրողների համայնքի բնակիչ լինելու փաստը։
Հարգելի պարոնայք, Վայոց ձորի մարզպետարանի, Եղեգնաձորի խոշորացված համայնքի ղեկավարի անգործության և ոչ իրավաչափ գործողությունների, իրավապահ կառույցների ներկայացուցիչների իմացությամբ, զրկել են հանրության մի ստվար մասին ՀՀ Սահմանադրությամբ, ՀՀ օրենքներով, Միջազգային կոնվենցիաներով սահմանված մարդու իրավունքներից, այն է` նորմալ պայմաններում մասնակցել հանրային լսմանը, խոսքի ազատությանը, առաջարկություն ներկայացնել, կարծիք հայտնել, ստորագրել: Նման ձևով զրկել քաղաքացուն հանրային լսմանը մասնակցելու, իր սեփական կարծիքը չկարողանալով հայտնել, կարող է տեղի ունենալ անօրեն, մի խավար պետությունում, որտեղ չկան ապրելու տարրական պայմաններ։
Մենք գտնում ենք, որ այդ ամբողջը եղել է կազմակերպված սցենարով, ի սկզբանե, Եղեգնաձորի բարեկարգ ամֆիթատրոնի փոխարեն կազմակերպել հանրային լսում Գլաձորի մարզադաշտում, որտեղ չկա լուսավորություն, մասնակիցների նստելու հնարավորություն, փոշու, քամու, համատարած հակասանիտարական վիճակում, մթության մեջ, հեռախոսների լույսի, նկարահանող սարքերի լուսավորության տակ, բացահայտ ճնշումների, աղմուկի, վիրավորանքներ պայմաններում անցկացնել հանրային լսում, իրենց ոչ իրավաչափ գործողությունները վերահաստատելու համար (հիմք համացանցում հրապարակված բնապահպանների տեսաձայնագրությունները՝ «Կանաչ Հայաստան», «ԷկոԼուր» և այլք):
Եղեգնաձորի խոշորացված համայնքի բնակիչներս գտնում ենք, որ խախտվել է մեր ապրելու, արարելու Սահմանադրական իրավունքները, պահանջում ենք կատարել քննություն, առ ոչինչ համարել ոչ իրավաչափ արձանագրությունը, խստորեն պատժել անգործություն ցուցաբերած ոչ օրինապաշտ ղեկավարներին՝ վերականգնելով հասարակության ՀՀ Սահմանադրությամբ և օրենքներով ամրագրված իրավունքները։
Հարգանքով` Եղեգնաձոր խոշորացված համայնքի մի խումբ բնակիչներ»:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
