Ձեր վստահելի աղբյուրը

Գերմանիայի մի շարք առևտրի կենտրոններ սկսել են անջատել շարժասանդուղքները՝ էլեկտրաէներգիայի խնայողության համար, «Ռիա Նովոստի» գործակալության փոխհաղորդում է Bild տաբլոիդը։

Ըստ աղբյուրի՝  որոշ շարժասանդուղքներ սկսել են անջատել «Saturn» ցանցի առևտրի կենտրոններում, ինչպես նաև «Galeria Karstadt Kaufhof» ցանցի հանրախանութներում:
«Լուսավորության և շարժասանդուղքների դեպքում մենք խնայում ենք էներգիան։ Երբ հնարավոր է այն անջատում ենք»,- ասել են «Galeria Karstadt Kaufhof»-ից։

Թերթը գրում է, որ «ECE» առևտրային հսկան նույնպես անջատում է շարժասանդուղքները «վաղ առավոտյան և երեկոյան ժամերին»։

IKEA խանութների ցանցի ներկայացուցիչն էլ հայտնել է, որ ուսումնասիրվում է շարժասանդուղքների անջատման, ինչպես նաև «էներգախնայողության այլ միջոցների» հնարավորությունը։

Գերմանիայում ձմռանը էներգետիկ կոլապս են կանխատեսում՝ ռուսական գազի մատակարարումների հնարավոր դադարեցման պատճառով։ Էկոնոմիկայի նախարար Ռոբերտ Հաբեկը և Դաշնային ցանցային գործակալության ղեկավար Կլաուս Մյուլլերը բազմիցս կոչ են արել համաքաղաքացիներին կրճատել էլեկտրաէներգիայի սպառումը՝ խնայելու նպատակով։