Ձեր վստահելի աղբյուրը

«Շատ վտանգավոր, նույնիսկ Նիկոլից վտանգավոր երևույթի հետ եմ վերջերս առնչվել. դա հիասթափությունն է, բայց մենք հիասթափվելու իրավունք չունենք, հիասթափությունը Նիկոլից մեծ վտանգ է»,- այս մասին  «Դիմադրություն» շարժման հանրահավաքի ժամանակ ասաց ԱԺ «Պատիվ ունեմ» խմբակցության ղեկավար Հայկ Մամիջանյանը։

Նրա խոսքով՝ մարդիկ մոտենում են իրեն և ասում են՝ չգիտեն ինչ անեն, թողնեն գնան երկրից. «Մենք չպետք է գնանք, ինքը (Փաշինյանը) պետք է գնա։

Հայկ Մամիջանյանը նշեց, որ Բրյուսելում Փաշինյան-Ալիև վերջին հանդիպումից հետո հրապարակված տեքստերում ոչ մի հիշատակում չկա Լեռնային Ղարաբաղի մասին։

«Վերջին շրջանում Ղարաբաղ էին գրում, հիմա նույնիսկ դա էլ չկա, ոչ, գերիների, ոչ թուրք զինյալների մեր սուվերեն տարածքից դուրս բերման հարցը կա։ Դա՞ է բանակցածդ, դրա մասին ես բանակցում։ Դրա փոխարեն արդեն պաշտոնապես Հայաստան-Ադրբեջան հարաբերությունները զատվել են,  դիֆերսիֆիկացվել են Ղարաբաղյան հակամարտությունից։ Դա նշանակում է, որ պաշտոնական Երևանը ձեռքերը լվանում է Արցախից։ Ու մենք դա թողել չենք կարող»,- ասաց պատգամավորը։

Նա նաև ասաց, որ ոչ մի պաշտոնյա պատերազմից հետո չի գնացել Արցախ, ՀՀ Ազգային ժողովը Ղարաբաղի անկախության օրվան նվիրված միջոցառումներին իշխանության կողմից ներկայացված է ընդամենը երկու-երեք պատգամավորով։ «Գիտեք, թե ինչու է այդպես, եթե նրանք գնան Արցախ, պիտի թիկնապահներով փողոցով քայլեն և, եթե մեջները մի կաթիլ ամոթ կա, պիտի գլուխները կախ անցնեն Ադրբեջանի դրոշների կողքով։ Բայց իրականում չեմ հավատում, որ ամոթից չեն գնում, իրենց տերերը չեն թողնում, որ գնան»,– նշեց պատգամավորը։

Հայկ Մամիջանյանի խոսքով՝ Փաշինյանն Արցախն արդեն ծախել է ու հիմա սկսել է Երևանի տարածքները վաճառել. «Բուհերն է ծախում, փորձում է ակադեմիական ավան կառուցել։ Տո դուք նույնիսկ տոպրակների օրենքը սուպերմարկետներում չկարողացաք սարքել, որ աշխատի, ակադեմիական ավան ո՞նց եք սարքելու»։

Պատգամավորն անդրադարձավ նաև  վերջին օրերին զինվորականների ձերբակալություններին։ «Ես միայն մի խնդրանք ունեմ, պարոնայք սպաներ, խոսեք ու պատմեք, թե ինչ ապօրինի ու դավաճանական հրամաններ եք ստացել։ Ախր դուք թշնամուց չեք վախեցել, Նիկոլն ո՞վ է, որ իրենից եք վախենում»,– ասաց Հայկ Մամիջանյանը։