Ձեր վստահելի աղբյուրը

Երևանի ընդհանուր իրավասության դատարանում այսօր անցկացվեց Նարեկ Մալյանի նկատմամբ հարուցված քրգործի քննությունը։

Մալյանին մեղադրանք է առաջադրվել Ռումինիայի Կոմունիստական կուսակցության առաջին քարտուղար Նիկոլայե Չաուշեսկույի մասին ներկայացում բեմադրելու համար։

Դատարանում Արթուր Սաքունցն իր ցուցմունքում ասաց՝ սորոսականների հասցեին արվել է «տապչկեքով սատակացնել» արտահայտությունը։

Մալյանի ներկայացուցիչ Տիգրան Աթանեսյանը հետաքրքրվեց՝ «տապչկայով սատկացնել»-ը Սաքունցն ընդունել է որպես սպառնալի՞ք։

«Նման արտահայտությունը բռնություն է ենթադրում, տապչկան օգտագործվում է  սատկացնելու համար, ուրիշ ի՞նչ անալոգ կընդունես»,-ասաց Սաքունցը։

Տիգրան Աթանեսյանը նկատեց՝ իր պաշտպանյալը ներկայացրել է Ֆրանսիայում տեղի ունեցած պատմական դեպքեր, որոնք վերաբերում են դավաճանների նկատմամբ գործողություններին, ինչո՞ւ է Սաքունցը դրանք կապում Հայաստանի հետ, ինչո՞ւ է այնտեղ սպառնալիք տեսնում։

«Օրինակ է բերվում, որ նման գործողություններ կիրառվելու են  ներկա իշխանությունների հետ համագործակցածների, նրանց ընտանիքների անդամների նկատմամբ»,-նշեց Սաքունցը՝ ավելացնելով, որ մեկ այլ երկրում նման գործողություններն անթույլատրելի կհամարվեին։

Փաստաբան Աթանեսյանը հետաքրքրվեց՝  «Պարոն Սաքունց, դուք ազգի դավաճա՞ն եք»։

Սաքունցի պատասխանը բացասական էր։

«Բա ինչի՞ եք վախենում, եթե ազգի դավաճան չեք»,-ասաց Աթանեսյանը։

«Դատալեքս»-ում հրապարակված մեղադրական եզրակացության համառոտ բովանդակության համաձայն,  «Նարեկ Մալյանին մեղադրանք է առաջադրվել այն բանի համար, որ նա Հայաստանի Հանրապետությունում հետպատերազմյա իրադրությամբ պայմանավորված հասարակության մոտ առկա տրամադրությունները և սոցիալ-հոգեբանական խոցելի իրավիճակն օգտագործելով, մեկ միասնական դիտավորությամբ անձանց խմբի՝ «Բաց հասարակության ինստիտուտի օժանդակության հիմնադրամ»Հայաստանյան մասնաճյուղի աշխատակիցների, ինչպես նաև վերջիններիս և Ջորջ Սորոսի աշխատակիցներին սատարող անձանց նկատմամբ աշխարհայացքով և այլ հայացքներով պայմանավորված դիտավորությամբ հնչեցրել է բռնություն գործադրելու հրապարակային կոչեր և հրապարակայնորեն արդարացրել է նման բռնությունը:

Բացի այդ, Նարեկ Բորիսի Մալյանը, Հայաստանի Հանրապետությունում հետպատերազմյա իրադրությամբ պայմանավորված հասարակության մոտ առկա տրամադրությունները և սոցիալ-հոգեբանական խոցելի իրավիճակն օգտագործելով, անձանց խմբի՝ ՀՀ վարչապե Նիկոլ Փաշինյանի և ՀՀ իշխանության անդամների նկատմամբ քաղաքական հայացքներով պայմանավորված, դիտավորությամբ հրապարակայնորեն արդարացրել է բռնությունը՝ սպանությունը»։

Մինչ նիստը, երեկ «ՎԵՏՕ» նախաձեռնության հիմնադիր Նարեկ Մալյանը ֆեյսբուքյան իր էջում գրել էր.

«Ասեմ, որ գերագույն հաճույք եմ ստանում այս դատավարությունից, որը ըստ էության վերածվել է իմ ներկայացման երկրորդ արարի: Քանի որ վերջերս այնքան է արժեզրկվել «քաղբանտարկյալ» եզրույթը ես ինքս ինձ համարում եմ քրեական հանցագործ, իսկ այս դատավարությունը սովորական պրոցես է իմ նման վտանգավոր քրեական հանցագործին արժանիորեն պատժելու (1-3 տարի ազատազրկուն) արդար նպատակով: Ուստի բոլոր նրանց ովքեր կգան տեղեկացնեմ, որ ինձ սատարել պետք չի, եկեք միասին ուղղակի վայելենք պրոցեսը: Կարող եք վաղվա դատին ներկայանալ պոպ կոռնով»։