Ձեր վստահելի աղբյուրը

«Ադրբեջանական գազը չի կարող փոխարինել ռուսական գազին, քանի որ միայն ԵՄ-ին Ռուսաստանը տարեկան 160 մլրդ մ³ գազ է արտահանում»,-Panorama.am-ին ասաց էներգետիկ և անվտանգության հարցերով փորձագետ Արմեն Մանվելյանը և պարզաբանեց. «Ադրբեջանի Թափ-Թանափի առավելագույն հնարավորությունը 10 մլրդ մ³ է, այսինքը 10 մլրդ-ով 160 մլրդ-ը չես փոխարինի: Բայց քանի որ ԵՄ-ն ներկայում գտնվում է էներգետիկ ճգնաժամի մեջ, ապա պարզ է՝ նույնիսկ 10 մլրդ մ³-ն իր համար մեծ թիվ է և կառույցը ցանկանում է փորձի այդ գազը ստանալ»:

Փորձագետը հայտնեց, որ վաղուց է խոսվում, որ Հունաստանը և Բուլղարիան ցանկանում են Ադրբեջանից ռեվերսային խողովակաշար կառուցել, որով կկարողանան միմյանց գազ փոխանցել ինչպես նաև այն Թափ-Թանափին միացնել:

«Խնդիրն այն է, թե արդյոք Իտալիան կհամաձայնի դրան, քանի որ այդ  գազի հիմնական գնորդը այդ երկիրն է, որը դրա համար վճարում է նախքան այն ստանալը: Նախկինում այն հնարավոր էր, բայց քանի որ այսօր ԵՄ բոլոր երկրները խնդիր ունեն, այդ թվում նաև Իտալիան, ապա կասկածում եմ, որ նա կամավոր Բուլղարիային գազ տա այն դեպքում, երբ վերջինս հրաժարվեց ռուսական գազից»,-ասաց Մանվելյանը:

Նրա խոսքով՝ արդեն 30 տարի է քննարկվում է նաև Թուրքմենական գազը Իրանի և Ադրբեջանի տարածքով Եվրոպա արտահանելու մասին, բայց ոչ մի արդյունք էլ չկա:

«Չեմ էլ կարծում, որ լինի, որովհետև Թուրքմենստանում հիմնական ներդրողը, հատկապես գազի բնագավառում, Չինաստանն է: Գործում է Թուրքմենստան-Չինաստան գազամուղ և վերջինս շահագրգռված է, որ այն գնա իր երկիր: Թուրքմենստանը գազ է վաճառում Իրանին և շահագրգռված է Թուրքմենստան-Աֆղանստան-Պակիստան գազատարի կառուցման մեջ»,-ասաց Արմեն Մանվելյանը:

Պատասխանելով Հայաստանի էներգետիկ անվտանգության վերաբերյալ  Panorama.am-ի հարցին՝ փորձագետն ասաց. «էներգետիկ անվտանկգության հարցերում մեղմ ասած լավ վիճակում չենք, քանի որ Հայաստանն իր էներգետիկ պարտավորությունները ձախողել է: Առաջին հերթին դեպի Իրան բարձրավոլտ կապի կառուցումն էր, որը 2019-ին պետք է ավարտվեր, բայց չի արվել: Հետևաբար՝ էլեկտրաէներգիայի արտահանումը դեպի Իրան շատ ցածր մակարդակի վրա է: Մենք դեպի Վրաստան բարձրավոլտի կառուցման ծրագիր էլ ունեինք, ինչը հնարավորություն կտար Վրաստանով կապվել ՌԴ-ի հետ և էլեկտրաէներգիա արտահանել, բայց կարծես թե այս ծրագիրն էլ է ձախողվել՝ ընդհանրապես չի էլ սկսվել»:

Հարցին, թե հնարվո՞ր է առաջիկայում Հայաստանում գազը թանկանա՝ Արմեն Մանվելյանն ասաց. «Ես դժվարանում եմ ասել: Գազի գինը մի գին է, որը քաղաքական արժեք ունի: Այն  պայմանավորված է երկու երկրների քաղաքական հարաբերությունների որակից: Եթե գինը բարձրանա, նշանակում է այդ հարաբերությունների որակը շատ վատն է, իսկ Հայաստանի համար գինը 2 անգամ բարձրացել է՝ 2019թ-ին մոտավորապես 150 դոլարից դարձավ 165 դոլար: Իրականում մենք նույնիսկ 150 դոլար էլ չէինք վճարում, այլ ավելի քիչ էինք վճարում՝ 135 դոլար: Այն դարձավ 165 դոլար, հետո՝ 178 դոլար, որի մասին ընդհանրապես պաշտոնապես չի էլ խոսվում: կրկնեմ, դժվարանում եմ ասել, թե Հայաստանի համար գազի սակագինը կբարձրանա, թե ոչ, բայց, դատելով հարաբերությունների որակից, ավելի շատ հակված եմ կարծելու, որ այն կբարձրանա, ոչ թե կմնա նույնը»:

Պատրաստեց՝ Ա. Վարդանյանը