«Լիդիան Արմենիա»-ն ցանկանում է ընդերքօգտագործման իրավունքի ժամկետը երկարաձգել շուրջ 3,5 տարով

Տնտեսություն 18:59 06/09/2022 Հայաստան

«Լիդիան Արմենիա» ՓԲԸ-ն դիմել է ՀՀ տարածքային կառավարման և ենթակառուցվածքների նախարարություն (ՏԿԵՆ)՝ Ամուլսարի հանքավայրի ընդերքօգտագործման իրավունքի ժամկետը 3 տարի 5 ամիս 20 օրով երկարաձգելու խնդրանքով: Այս մասին 2022թ. սեպտեմբերի 6-ին «ԷկոԼուրի» հարցմանն ի պատասխան հայտնել է ՀՀ տարածքային կառավարման և ենթակառուցվածքների փոխնախարար Հովհաննես Հարությունյանը:

ԷկոԼուրին ուղղված նամակում նշված է. «Տեղեկացնում ենք, որ «Լիդիան Արմենիա» փակ բաժնետիրական ընկերությունը 06.07.2022թ-ի թիվ Հ/Ա-2022/25 գրությամբ դիմել է ՀՀ տարածքային կառավարման և ենթակառուցվածքների նախարարություն խնդրանքով՝ ընդերքօգտագործման իրավունքի ժամկետը 3 տարի 5 ամիս 20 օրով երկարաձգելու: Ընկերության կողմից ներկայացվել է փոփոխված ժամանակացույցով նախագիծը և անհաղթահարելի ուժի վերացման վերաբերյալ հիմնավորումները: Միաժամանակ հայտնում ենք, որ «Լիդիան Արմենիա» ՓԲԸ-ի վերոգրյալ գրությունը ՀՀ ՏԿԵ նախարարությունում քննարկվում է»։

Այսպիսով, «Լիդիան Արմենիա» ՓԲԸ-ն առաջին ու դեռևս միակ ընկերությունն է, որը օգտվել է «Ընդերքի մասին լրացումներ և փոփոխություններ կատարելու մասին» ՀՀ օրենքում արված փոփոխություններից:

Հիշեցնենք, որ ս.թ. հունիսի 18-ին ՀՀ նախագահ Վահագն Խաչատուրյանը ստորագրեց «Ընդերքի մասին օրենսգրքում լրացումներ և փոփոխություններ կատարելու մասին» ՀՀ օրենքը, որի 55.1 հոդվածով նախատեսվում է ընդերքօգտագործման իրավունքի ժամկետի երկարաձգում անհաղթահարելի ուժի՝ հրդեհների, ջրհեղեղների, երկրաշարժների, փոթորիկների կամ այլ բնական աղետների, պայթյունների, պատերազմի, ահաբեկչության, քաղաքացիական պատերազմի, այդ թվում և քաղաքացիական անհնազանդության հիմքով:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: