Ձեր վստահելի աղբյուրը

ԱՄՆ Պետքարտուղարությունը հայտարարել է, որ Հունաստանի ինքնիշխանությունը իր կղզիների նկատմամբ վիճարկելի չէ։ Այդ կերպ է դիվանագիտական կառույցի ներկայացուցիչը մեկնաբանել «Հունաստանի կողմից օկուպացված կղզիների մասին» Թուրքիայի վերջին հայտարարությունների վերաբերյալ հույն լրագրողների հարցին:

ՏԱՍՍ-ը գրում է, որ չորեքշաբթի խնդրին անդրադարձել է հունական ERT հեռուստաալիքը։

Պետդեպարտամենտի ներկայացուցչի խոսքով՝ ուկրաինական իրադարձությունների ժամանակ հատկապես արդյունավետ չեն այն հայտարարությունները, որոնք կարող են մեծացնել լարվածությունը ՆԱՏՕ-ի դաշնակիցների միջև։

Միացյալ Նահանգները շարունակում է ՆԱՏՕ-ի դաշնակիցներին կոչ անել միասին աշխատել տարածաշրջանում խաղաղության և անվտանգության պահպանման և վեճերը դիվանագիտական ճանապարհով լուծելու համար: Բոլոր երկրների ինքնիշխանությունն ու տարածքային ամբողջականությունը պետք է հարգվեն և պաշտպանվեն: Այդ կղզիների նկատմամբ Հունաստանի ինքնիշխանությունը վիճարկելի չէ: Մենք կոչ ենք անում բոլոր կողմերին զերծ մնալ հռետորաբանությունից և գործողություններից, որոնք կարող են հանգեցնել լարվածության հետագա սրման»,-ասել է նա։

Թուրքիայի նախագահ Ռեջեփ Թայիփ Էրդողանը երեքշաբթի օրը Բոսնիա և Հերցեգովինայում կայացած մամուլի ասուլիսում սպառնացել է Հունաստանին պատասխանել այն սադրանքներին, որոնք, Անկարայի պնդմամբ, շարունակվում են Էգեյան ծովում թուրքական F-16 կործանիչների դեմ հունական բանակի կողմից։

«Ռադարները ֆիքսում են մեր ինքնաթիռները, և դա լավ նշան չէ: Մեր համբերության բաժակը լցվել է: Մենք ցանկացած պահի կարող ենք առանց նախազգուշացման գալ: Նրանք բազաներ ունեն այդ կղզիներում: Եթե մեր դեմ սպառնալիքները շարունակվեն նույն ոգով, ապա մեր համբերությունը կսպառվի»,-ասել է Էրդողանը։

Հունաստանի արտաքին գործերի նախարար Նիկոս Դենդիասը երեքշաբթի օրը Աթենքում Ֆրանսիայի արտգործնախարար Քեթրին Կոլոննայի հետ համատեղ հայտարարությունների ժամանակ ասել էր, որ «գրեթե ամեն օր թուրք պաշտոնյաները տարակուսելի հայտարարություններ են անում Հունաստանի և հույն ժողովրդի դեմ»։

«Կան քարտեզներ, որոնք ցույց են տալիս հունական կղզիները որպես թուրքական: Թուրքական կողմը պնդում է, որ այդ կղզիները «գրավված են հույների կողմից» և այսօր կրկնվեց սպառնալիքը, որ «նրանք (թուրքերը) կարող են հանկարծակի գալ գիշերը և ներխուժել այդ կղզիները»: Դենդիասը հիշեցրել է, որ «Էգեյան ծովի այս կղզիների դիմաց թուրքական կողմից տեղակայված է Եվրոպայի ամենամեծ դեսանտային նավատորմը և մի ողջ թուրքական բանակը»։ Արտգործնախարարն ընդգծել է, որ Հունաստանը բավականաչափ ուժ ունի իր տարածքային ամբողջականությունը թուրքական սպառնալիքներից պաշտպանելու համար։