Ձեր վստահելի աղբյուրը

Panorama.am-ն այս տարվա օգոստոսի 30-ին «2022թ.-ին ստերջացված էգ շունը երեք ձագի հետ շրջում է Երևանի փողոցներում» վերնագրով հոդվածում հայտնել էր, որ Երևանի Ազատամարտիկների փողոցի շենքերից մեկի բակում բնադրվել է ստեջացված մի շուն՝ երեք հատ 3-5 ամսական ձագերի հետ: Ձագերը ստերջացված չէին՝ չնայած համապատասխան տարիքում գտնվելու փաստին:

Հոդվածի հրապարակման նույն օրը Panoramaam էր զանգահարել «Թափառող կենդանիների վնասազերծման կենտրոն» ՀՈԱԿ-ի տնօրենի պաշտոնակատար Հարություն Առաքելյանը  և հայտնել, որ մայր շունը կենտրոն ստերջացման է տեղափոխվել արդեն ձագերի հետ, իսկ վերջիններս չեն ստերջացվել, քանի որ այդ ժամանակ դեռ փոքր են եղել:

Երևանի քաղաքապետարանի լրատվության վարչությունից էլ պարզաբանել էին, որ շան ձագերի ստերջացումը և կատաղություն հիվանդության դեմ պատվաստումը իրականացվում է 4-5 ամսականից: Նախորդ հոդվածում հրապարակված լուսանկարներից երևում էր, որ ձագերն արդեն մեծացել էին և միանշանակ ստերջացման տարիքի են:

Օգոստոսի 30-ի մեր հրապարակումից մի քանի օր անց նույն շենքի բակում նկատեցինք վերոհիշյալ մայր շանը՝ արդեն ստերջացման մասին վկայող կլիպսերը ականջներին ձագերով:

Panorama.am-ի առաջին հրապարակումից կարճ ժամանակ անց «Թափառող կենդանիների վնասազերծման կենտրոն» ՀՈԱԿ-ի աշխատակիցները օպերատիվ կերպով հայտնաբերել և ստերջացրել էին համապատասխան տարիքի հասած ձագերին: