Ձեր վստահելի աղբյուրը

Բաշկիրիայի ավելի քան 30 ձեռնարկություն մտադիր է համագործակցություն հաստատել Հայաստանի գործընկերների հետ։ «Ռեգնումի» փոխանցմամբ՝ այդ մասին սեպտեմբերի 9-ին հայտնել են մարզային կառավարության մամուլի ծառայությունից։

Այս հարցը քննարկվել է մարզի կառավարությունում «Առևտրային ներկայացուցչի հետ ժամի» ձևաչափով առցանց խորհրդակցության ժամանակ։

«2022 թվականի առաջին կիսամյակում փոխադարձ առևտրի 5,2 անգամ աճը վկայում է այն մասին, որ Հայաստանի Հանրապետության հետ առևտրային համագործակցությունը ոչ միայն պահպանվել, այլև ամրապնդվել է։ Միևնույն ժամանակ, մենք շարունակում ենք աշխատել դեպի այս երկիր արտահանման մասնաբաժինն ավելացնելու ուղղությամբ»,-մամուլի ծառայությունը մեջբերել է Բաշկիրիայի արտաքին տնտեսական կապերի և կոնգրեսի գործունեության նախարար Մարգարիտա Բոլիչևայի խոսքերը։

Հաղորդագրության մեջ նշվում է, որ Բաշկիրիայից պատվիրակությունը կարող է Հայաստան այցելել 2022 թվականի նոյեմբերի սկզբին։

Հաղորդվում է, որ Բաշկիրիայի ավելի քան 30 ձեռնարկություններ, որոնք զբաղվում են գյուղատնտեսությամբ, քիմիական և նավթարդյունաբերությամբ, ինչպես նաև ալկոհոլային խմիչքների և սննդամթերքի, թղթե փաթեթավորման, մեղրի և ճենապակյա սպասքի արտադրությամբ, հետաքրքրված են Հայաստանի գործընկերների հետ համագործակցությամբ։

«Հիշեցնենք, որ 2021 թվականի արդյունքներով Հայաստանում Ռուսաստանի առևտրային ներկայացուցչությունը ճանաչվել է արտաքին առևտրի լավագույն ներկայացուցչություն»,-հյտնում է «Ռեգնումը»։