Ձեր վստահելի աղբյուրը

«Այն, որ օգոստոսի 31-ից հետո ԱԳՆ-ն տարակարծություն հայտնեց ձեռքբերված պայմանավորվածությունների վերաբերյալ, արդեն նշանակում է, որ առաջիկայում պատերազմ է լինելու Սյունիքում»,- «Հայաստանի իրական օրակարգը. Հայաստան և Արցախ. անվտանգային ահագնացող սպառնալիքներ» քննարկման ժամանակ ասաց «Անկախություն» շարժման առաջնորդ Էդգար Ղազարյանը։ Նա չբացառեց, որ դա կարող է տեղի ունենալ առաջիկա օրերին՝ նկատի ունենալով կլիմայական գործոնները և երկու տարի առաջվա պատերազմի օրացույցը։

Նա հիշեցրեց Ադրբեջանի նախագահ Ալիևի այն հայտարարությունը, որ եթե բանակցությունների արդյունքում չստանա իր համար ցանկալի միջանցքը, ապա այդ խնդիրը լուծելու է ռազմական ճանապարհով։

«Չի եղել որևէ հակադարձություն ոչ միջազգային հանրության, ոչ հայկական կողմից, որը կստիպի նրան ձեռնապահ մնալ այդ արկածախնդրությունից։

Պատերազմ է սպասվում Սյունիքում, թիրախ է դառնալու նաև Վարդենիսը, չի բացառվում առաջիկայում հայ-ադրբեջանական սահմանը սկսվի Արենի գյուղից և սրան դիմակայելու համար մեր քննարկումներն այլևս բավարար չեն դրան դիմակայելու համար»,- ասաց նա։

Քաղաքական գործչի խոսքով, հայ ժողովորդի ամենամեծ թշնամին խաբերությամբ զավթել է  ժողովրդի իշխանությունը և այն ծառայեցնում է թշնամու շահերին։

«Նրա դեմ պայքարն այլևս քաղաքական պայքար չի կարող լինել, պետք է լինի ազգային ազատագրական պայքար։  Այստեղ միայն պատգամավորները, որոշակի ֆորմալ կարգավիճակ ունեցող գործիչները բավարար չեն  մեր պետության ամենամեծ սպառնալիքը չեզոքացնելու համար»,- նշեց Է.Ղազարյանը՝ խնդրելով պատգամավորներին վերադառնալ պառլամենտ՝  Նիկոլ Փաշինյանին  իշխանությունից վռնդելու օրակարգով։