Ձեր վստահելի աղբյուրը

Նիկոլ Փաշինյանն Ազգային ժողովում իր ելույթի ժամանակ կարծիք հայտնեց, որ Ադրբեջանի հարձակումը հայկական դիրքերի ուղղությամբ պայմանավորված է նաև Հայաստանի տնտեսական դինամիկայով։

«Ակնհայտ է, որ  ի հեճուկս գլոբալ  դժվարությունների, Հայաստանն ունի շատ հստակ որոշակի տնտեսական հաջողություններ և նաև այս համատեքստում, իհարկե,  ոչ անմիջականորեն, բայց շատ կարևոր եմ համարում, որ մի քանի օր առաջ հրապարակվեց տնտեսական ազատության ինդեքսը,  որտեղ Հայաստանը զբաղեցնում է 11-րդ տեղն աշխարհի 165 երկրների շարքում։

Այս սադրանքը Հայաստանի տնտեսական դինամիկան կոտրելու նպատակ ունի նաև, որովհետև դա միայն վիճակագրական թվեր չէ, այլ զարգացման որոշակի հնարավորություն»,-ասաց Նիկոլ Փաշինյանը։

Նշենք, որ Փաշինյանի ելույթի ժամանակ ընդդիմադիր «Հայաստան» և «Պատիվ ունեմ» խմբակցությունների պատգամավորները նիստերի դահլիճում չէին, չնայած նրանք այսօր երկար դադարից հետո վերադարձել էին Ազգային ժողով։ Նրանց սեղաններին միայն Արցախի դրոշներն էին։ 

Հիշեցնենք, որ սեպտեմբերի 13-ի կեսգիշերին Ադրբեջանի ԶՈՒ ստորաբաժանումները հրետանային միջոցների, ականանետերի, ԱԹՍ-ների, խոշոր տրամաչափի հրաձգային զինատեսակների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ, մասնավորապես հրետակոծման են ենթարկվել Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը, հարվածներ են հասցվել նաև քաղաքացիական ենթակառուցվածքներին։ ՀՀ պաշտպանության նախարարության կողմից կա հաստատված 49 զոհ։  

Ադրբեջանի զինված ստորաբաժանումների կողմից հայկական դիրքերի և բնակավայրերի ուղղությամբ հրետակոծության հետևանքով վիրավորում է ստացել քաղաքացիական երեք անձ: ՀՀ առողջապահության նախարարությունից հայտնում են, որ նրանցից մեկի առողջական վիճակը գնահատվում է ծանր, երկուսինը` բավարար: