Ձեր վստահելի աղբյուրը

Ազգային ժողովն ադրբեջանական հարձակման վերաբերյալ ընդունեց հայտարարություն։

Հայտարարության նախագծի համահեղինակ ՔՊ-ական Վլադիմիր Վարդանյանն ասաց, որ ընդդիմադիր «Հայաստան» և «Պատիվ ունեմ» խմբակցությունները ներկայացրել էին առանձին առաջարկների փաթեթներ։

Նրա խոսքով, «Հայաստան» խմբակցության ներկայացրած առաջարկների փաթեթն ուղղակիորեն կամ անուղղակիորեն վերաբերելի չէր երեկ սանձազերծած ագրեսիվ գործողություններին, «Պատիվ ունեմ» խմբակցության կողմից ներկայացված առաջարկների մի մասը որոշ  մասով վերաբերելի էին ստեղծված իրավիճակին, պատրաստ էին մասնակիորեն հաշվի առնել այդ առաջարկներն այս հայտարարության մեջ։ Վ.Վարդանյանն ասաց, որ «Պատիվ ունեմ» խմբակցության ղեկավար Հայկ Մամիջանյանի հետ երկարատև քննարկումների ընթացքում հնարավոր չի եղել համաձայնեցնել առաջարկների այնպիսի փաթեթ, որոնք կընդգրկեին նրանց կողմից ներկայացված առաջարկների մի մասը։

«Մեզ համար չափազանց կարևոր էր այսօր դահլիճում ունենալ միասնականություն  խորհրդարանական բոլոր խմբակցությունների միջև։ Ցավոք դա չհաջողվեց»,- ասաց ՔՊ-ական պատգամավորը։ 

Նա ներկայացրեց հայտարարության տեքստը.

«Սեպտեմբերի 13-ին, ժամը 00:05-ին, Ադրբեջանի զինված ուժերի ստորաբաժանումները, հրետանային միջոցների, ականանետերի ու ԱԹՍ-ների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ: Մասնավորապես` հրետակոծման են ենթարկվել Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը: Հարվածներ են հասցվում ինչպես ռազմական, այնպես էլ քաղաքացիական ենթակառուցվածքներին: Որոշ ուղղություններով ադրբեջանական ստորաբաժանումները ձեռնարկել են դիրքային առաջխաղացման գործողություններ Հայաստանի Հանրապետության ինքնիշխան տարածքում:

Ստեղծված իրավիճակում մեր լիակատար աջակցությունն ենք հայտնում ՀՀ Զինված ուժերին` Հայաստանի Հանրապետության տարածքային ամբողջականության և ինքնիշխանության պահպանման սուրբ գործում: Բոլոր քաղաքական ուժերին, մեր բոլոր հայրենակիցներին` անկախ քաղաքական դիրքորոշումներից, կոչ ենք անում պահպանել հանգստություն և համախմբվել պետականության շուրջ: Մեր բոլորի հայրենիքը միասնական և կուռ պաշտպանության կարիք ունի:

Միջազգային հանրությանը կոչ ենք անում խստորեն եւ հասցեական կերպով դատապարտել ՀՀ դեմ Ադրբեջանի ռազմաքաղաքական ղեկավարության կողմից սանձազերծված ագրեսիան, ՄԱԿ-ի Կանոնադրությամբ ամրագրված` տարածքային ամբողջականության դեմ ուժի և ուժի կիրառման սպառնալիքի արգելման սկզբունքի կոպտագույն խախտումները:

ՄԱԿ ԱԽ-ից ակնկալում ենք ստեղծված իրավիճակի անհապաղ քննարկում և իրավիճակից բխող գործողությունների իրականացում:

ՀԱՊԿ-ից պահանջում ենք Հավաքական անվտանգության պայմանագրով ստանձնված պարտավորություններից բխող անհապաղ միջոցառումների իրականացում ուղղված ՀՀ տարածքային ամբողջականության պահպանմանը:

Դիմում ենք Ռուսաստանի Դաշնությանը` շուտափույթ իրագործելու Հայաստանի Հանրապետության եւ Ռուսաստանի Դաշնության միջեւ բարեկամության, համագործակցության և փոխադարձ օգնության մասին պայմանագրում ամրագրված պարտավորությունները` ի պաշտպանություն ՀՀ տարածքային ամբողջականության:

Նա նշեց, որ այս հայտարարությունը բխում է  ՀՀ ազգային շահերից, ընդգրկում է  բոլոր այն հնարավոր մեխանիզմները, որոնք  անհրաժեշտ են, որպեսզի ՀՀ-ն իր միջազգային գործընկերների հետ իրականացնի  համապատասխան գործողությունները և այս նախագիծն, ըստ էության, ուղղված է նրան,  որպեսզի «մենք ունենանք առավել հզոր, ավելի ամուր պետականություն»։

 Ադրբեջանի հարձակման վերաբերյալ ԱԺ հայտարարությունն ընդունվեց 65 կողմ, 0 դեմ, 0 ձեռնպահ ձայներով։