Ձեր վստահելի աղբյուրը

«Միջազգային արձագանքը Ադրբեջանի այս ագրեսիայի դեպքում, կարծում եմ, մեծամասամբ բավականին հասցեական էր, անշուշտ՝ մի շարք երկրների և կազմակերպությունների դեպքում ոչ այնքան հասցեական և արձանագրող, որքան մենք կցանկանայինք և որը կհամապատասխաներ իրականությանը»,-կառավարության հետ հարցուպատասխանի ժամանակ հայտարարեց  Արարատ Միրզոյանը՝ պատասխանելով Վիգեն Խաչատրյանի այն հարցին, որ արևմտյան երկրները հասցեական են արտահայտվել Ադրբեջանի ագրեսիային, բայց անհասկանալի է ՀԱՊԿ-ի վերաբերմունքը Հայաստանի խնդրանքին:

Վիգեն Խաչատրյանը նաև հայտնեց, որ ռուսական երրորդ ալիքը հաղորդում է հրապարակել «ՀԱՊկ ուժերը հրաժարվել են աջակցել Հայաստանին հակամարտության հարցում» վերնագրով հաղորդում և որի ժամանակ խոսեցրել են փորձագետի, որը ապատեղեկատվություն է տարածել՝ ասելով թե ՀԱՊԿ ուժերը չեն ուղարկվել Հայաստան, քանի որ այնտեղ են արդեն ՌԴ խաղաղապահները:

Անդրադառնալով ՀԱՊԿ-ին վերաբերող հարցին՝ Միրզոյանը հայտնեց, որ լինելու է դիտորդական առաքելություն և հայկական կողմը կարծում է, որ այդ առաքելությունը կժամանի արդեն վաղը:

«Ընդհանուր առմամբ պետք է ասել, որ մեր դիմումը պատշաճ կարգով քննարկվել է ՀԱՊԿ խորհրդում»,-հայտարարեց Արարատ Միրզոյանը:

Նրա խոսքով՝ մեր օրերում բոլոր երկրների մեդիատարածքներում խառնաշփոթ կա, որը վերաբերում է և՛ հայկական, և՛ ռուսական, և այլ երկրի մեդիատարածքներին, որտեղ  ապատեղեկատվություն տարածողների պակաս  չկա, բացառություն չէ նաև ռուս փորձագետը:

«Այսպիսի իրավիճակում Հայաստանի դիմումով ՀԱՊԿ խորհրդի նիստ հրավիրելը և  առաքելության ուղարկումը Հայաստան դեռ չէր եղել և հիմա այդ որոշումը կայացված է»,-կրկնեց Միրզոյանը: