Ձեր վստահելի աղբյուրը

«Երբ մենք ասում ենք՝ Ադրբեջանն ագրեսիա է իրականացրել Հայաստանի նկատմամբ, նաև նկատի ունենք, որ որոշակի տարածքի նկատմամբ հսկողություն է սահմանել։ Հենց այս է պատճառը, որ դիմել ենք ՀԱՊԿ-ին»,- Ազգային ժողովում կառավարության հետ հարցուպատասխանի ժամանակ հայտարարեց Նիկոլ Փաշինյանը։

Նա ասաց, որ ՀԱՊԿ-ին դիմել են պայմանագրի 4-րդ հոդվածի հիման վրա, երբ ասվում է, որ  անդամ երկրներից մեկի նկատմամբ ագրեսիան համարվում է  ագրեսիա մյուս երկրների նկատմամբ։

«Ինչ ենք խնդրել մենք ՀԱՊԿ-ից. խնդրել ենք, դիմել ենք օգնության՝ այդ թվում ռազմական, Հայաստանի Հանրապետության տարածքային ամբողջականությունը վերականգնելու և ՀՀ տարածքից Ադրբեջանի ԶՈՒ դուրսբերումը ապահովելու համար։ Այս վերնագրի ներքո նկատի ունենք նաև նախորդ տարվա մայիսի 12-ի ներխուժումը»,- ասաց Փաշինյանը։

Նրա խոսքով, այն, որ երեկ կայացել է ՀԱՊԿ նիստ, գոհացուցիչ փաստ է. «Կարծում եմ՝ տեղի է ունեցել անկեղծ, բաց քննարկում։ Կարծում եմ, իրավիճակի գնահատման առումով, նվազագույն անհրաժեշտ որոշումներ են կայացվել այս փուլի համար։

Մեր քաղաքական խնդիրը  և դիրքորոշումը հետևյալն է.  Հայաստանի և Ադրբեջանի միջև կա սահման, այդ սահմանը ճանաչված է և այդ սահմանի ճանաչումը վավերցված է երկու երկրների կողմից։ Եթե Ադրբեջանն ասում է՝ նման բան չկա, ընդհանուր համատեքստում նրա արտահայտած մի շարք դիրքորոշումներ ընդհանրապես զրկվում են իմաստից և որևէ հիմնավորում չեն ունենում»։