Ձեր վստահելի աղբյուրը

ՌԴ ԱԳՆ պաշտոնական ներկայացուցիչ Մարիա Զախարովան հինգշաբթի՝ սեպտեմբերի 15-ին, ճեպազրույցում անդրադարձել է հայ-ադրբեջանական սահմանային Ադրբեջանի սանձազերծած ռազմական գործողություններին։

«Չնայած ներկա էսկալացիային և լարվածությանը, փորձագետների կողմից կատարվածի վերլուծությանը, Հայաստանի և Ադրբեջանի միջև խաղաղության պայմանագրի նախապատրաստման աշխատանքները չեն դադարել։ Եվ, հավանաբար, սա է գլխավոր առաջնահերթությունը»,-հայտարարեց Զախարովան։

Նա նշել է, որ ռուսական կողմը ցուցաբերում է անհրաժեշտ օգնություն։

«Հայ-ադրբեջանական հարաբերությունների կարգավորման հարցերով նախարարի հատուկ ներկայացուցիչ Իգոր Խովաևը սեպտեմբերի 8-9-ը այցելել է Բաքու, իսկ սեպտեմբերի 13-14-ը` Երևան: Բանակցությունների հիմնական թեման խաղաղության պայմանագրի նախագծի քննարկումն է։ Մենք ձգտում ենք մերձեցնել կողմերի դիրքորոշումները, և վստահեցնում եմ, որ համապատասխան ջանքերը կշարունակվեն»,-ասազ Զախարովան։

Հարցին, թե հաշտեցման կոնկրետ ի՞նչ ուղիներ կարող են լինել՝ ՌԴ ԱԳՆ ներկայացուցիչը նշեց. «Մենք ելնում ենք նրանից, որ Ռուսաստանի Դաշնության, Հայաստանի և Ադրբեջանի ղեկավարների միջև եռակողմ պայմանավորվածությունները տարածաշրջանում մնում են կարգավորման հիմքը։

Հայ-ադրբեջանական սահմանին տեղի ունեցած վերջին սրման առնչությամբ ՌԴ դիրքորոշումը մանրամասն ներկայացված է ԱԳՆ սեպտեմբերի 13-ի հայտարարության մեջ»։

ՌԴ ԱԳՆ ներկայացուցիչը հավելեց. «Հրադադարի առաջին պայմանավորվածությունից հետո, ցավոք, կրկին փոխհրաձգություններ եղան։ Երեկ նոր պայմանավորվածություն է ձեռք բերվել, և մենք ակնկալում ենք, որ այն կհարգվի։ Մենք կրկին կոչ ենք անում կողմերին զսպվածություն դրսևորել, բոլոր խնդիրները լուծել քաղաքական և դիվանագիտական միջոցներով, այդ թվում՝ Ռուսաստանի խորհրդատվական աջակցությամբ հայ-ադրբեջանական սահմանի սահմանազատման եռակողմ հանձնաժողովի շրջանակներում»:

Զախարովան ընդգծեց, որ Ռուսաստանն ամեն ինչ անում է լարվածությունը թուլացնելու համար։

«Մենք ակնկալում ենք, որ տարածաշրջանում իրավիճակի սրման հարցն ուշադրության կենտրոնում կլինի նաև Ռուսաստանի և Ադրբեջանի նախագահների հանդիպման ժամանակ, որը նախատեսված է ՇՀԿ գագաթնաժողովի շրջանակներում»,-ասաց նա։

Նրա խոսքով, զգալի ջանքեր են գործադրվում պաշտպանության նախարարության և Ռուսաստանի ԱԴԾ սահմանապահ ծառայության միջոցով։

«Մեր զինվորականները սերտ կապի մեջ են երկու կողմերի հետ՝ կայուն հրադադարի հասնելու և ադրբեջանական ու հայկական զորքերին իրենց սկզբնական դիրքերը վերադարձնելու համար»,-ասաց Զախարավան։