Ձեր վստահելի աղբյուրը

ԱԺ դիմաց հավաքված քաղաքացիներին, որոնք պահանջում են պատգամավորներից անվստահություն հայտնել Նիկոլ Փաշինյանին, քաղաքական-հասարակական գործիչ Էդգար Ղազարյանը հայտնեց, որ խոսել է «Հայաստան» խմբակցության պատգամավորր Իշխան Սաղաթելյանի հետ, ով այժմ ընդդիմադիր այլ պատգամավորների հետ Ազգային ժողովում է։

«Ինչ դիրքորոշում ունեն իրենք։  Իրենք ասում են՝ մենք այստեղ ենք, գնացեք, բերեք 18 պատգամավոր։ Պատգամավոր բերելու հարցում իրենք ունեն քսան անգամ ավելի լիազորություն, քան այստեղ կանգնած յուրաքանչյուր մեկը։ Ակնկալել, որ ՔՊ 18 պատգամավոր գալու է և որոշում կայացնի, ոչ մի երեխա դրան չի հավատում։

Պատգամավորներն այս պահին, բացի շենք մտնելուց, ուրիշ ոչինչ չեն արել, նրանք նույնիսկ լայվ են արել, որ ակնկալում են, որ ՔՊ-ական պատգամավորները պիտի գան։ Բայց պարզ է, որ այդ լայվով չեն գալու։  Կոնկրետ չեն զանգել ԱԺ նախագահին, որ գա, հրավիրի աշխատակազմ ու ապահովի պատգամավորների ներկայությունը։

Ինչու իրենք չեն ստորագրում․ Սահմանադրության պահանջն է, որպեսզի վարչապետին անվստահություն հայտնեն, իրենք պետք է առաջադրեն նոր վարչապետի թեկնածու։ Իրենք այդ թեկնածուն չունեն։ Բայց պատգամավորներն իրենք են պարտավոր և միայն իրենք կարող են առաջադրել վարչապետի թեկնածու։

Ես դեռ օգոստոսի 23-ին եմ ասել, որ եթե դուք չեք առաջադրում վարչապետի թեկնածու և ինձ էլ չեք առաջադրում, ապա ստացվում է, որ դուք այդ գործընթացն ուղղակի չեք սկսում։

Հիմա այս պահին մեր երկիրն անտերության է մատնված, փաստացի Նիկոլ Փաշինյանը իշխանություն չունի։ Պետք է պահանջել, որ ԱԺ պատգամավորները կարճ ժամանակ հետո գան այստեղ և հայտարարեն, թե ով է վարչապետի թեկնածու»։

Հիշեցնենք, որ սեպտեմբերի 14-ին ԱԺ-ում Նիկոլ Փաշինյանի հայտարարություններից հետո քաղաքացիներն ինքնաբուխ հավաքվել են ԱԺ դիմաց։ Նրանք պահանջում են պատգամավորներից անվստահություն հայտնել Նիկոլ Փաշինյանին։ «Հայաստան» խմբակցության պատգամավոր Իշխան Սաղաթելյանը հայտարարել է, որ երկու ընդդիմադիր խմբակցությունների 35 պատգամավորներ պատրաստ են ստորագրել Նիկոլ Փաշինյանի պաշտոնանկության տակ ու սկսել գործընթաց, անհրաժեշտ է ՔՊ-ական ևս 18  պատգամավորի ստորագրություն։ Այս հայտարարությունից հետո ԱԺ դիմաց հավաքված քաղաքացիների պահանջով ընդդիմադիր պատգամավորները մտան ԱԺ շենք՝ սպասելով ՔՊ-ական պատգամավորներին։ ՔՊ-ական մի քանի պատգամավորների  հասցեները հենց ԱԺ դիմաց հրապարակվեցին, որպեսզի քաղաքացիներն իրենք գնան ու բերեն նրանց ԱԺ։