Ձեր վստահելի աղբյուրը

Ղազախստանի արտաքին գործերի նախարարությունը հերքել է Հավաքական անվտանգության պայմանագրի կազմակերպությանը (ՀԱՊԿ) հանրապետության անդամակցության կասեցման մասին տեղեկությունը։ Լուրը հայտնում է «ՌԻԱ նովոստի»-ն:

Հանրապետության տեղեկատվության և սոցիալական զարգացման նախարարության աջակցությամբ ստեղծված stopfake.kz պորտալի համաձայն՝ սոցիալական ցանցերում և ակնթարթային մեսենջերներում հաղորդագրություններ են շրջանառվում, որ 2023 թվականի հունվարի 1-ից Ղազախստանը նախատեսում է դադարեցնել իր անդամակցությունը ՀԱՊԿ-ին։

«Որոշ սոցիալական ցանցերում հայտնված տեղեկատվությունը ՀԱՊԿ-ից Ղազախստանի իբր ծրագրված դուրս գալու մասին բացարձակ կեղծ է և չի համապատասխանում իրականությանը»,-ասվում է հինգշաբթի ԱԳՆ-ի հաղորդագրության մեջ։ Հաղորդագրության մեջ նշվում է, որ Ղազախստանը կանգնած է կազմակերպության ստեղծման ակունքներում, հանդիսանում է դրա ակտիվ մասնակիցը։

«ՀԱՊԿ-ին անդամակցությունը լիովին համապատասխանում է մեր երկրի ազգային շահերին»,-պարզաբանում է գործակալությունը։

Ըստ ԱԳՆ-ի՝ Հավաքական անվտանգության պայմանագիրը նախատեսում է իր անդամ երկրների, այդ թվում՝ Ղազախստանի անվտանգության իրավական պարտադիր երաշխիքներ։ Բացի այդ, ՀԱՊԿ-ի շրջանակներում մշակվում են հմտություններ՝ միջազգային ահաբեկչությանը, անօրինական միգրացիային, թմրամիջոցների ապօրինի շրջանառությանը, անդրսահմանային հանցագործությանը, տեղեկատվական ոլորտում սպառնալիքներին համատեղ հակազդելու համար։

«Այսպիսով, ՀԱՊԿ շրջանակներում համագործակցությունը Ղազախստանի արտաքին քաղաքականության կարևոր ուղղություն է, հանրապետության մասնակցությունը կազմակերպությանը նախատեսված է Ղազախստանի երկարաժամկետ ռազմավարական փաստաթղթերով»,-ընդգծել են ԱԳՆ-ում։