Ձեր վստահելի աղբյուրը

Հայաստանի և Արցախի շուրջ բավականին լուրջ ռազմաքաղաքական իրավիճակ է ստեղծված։ Այս մասին ԱԺ-ի մոտ ընթացող բողոքի ակցիայի ընթացքում ասաց «Հայաստան» խմբակցության պատգամավոր Սեյրան Օհանյանը։

Նրա խոսքով՝ սխալ ռազմաքաղաքական և քաղաքական գործողությունների արդյունքում ենք հասել այս վիճակին։

«Մեր թշնամին սկսել է սադրանքներ, հարձակվողական գործողություններ մի քանի անգամ։ Գիտեք՝ Սյունիքում, Գեղարքունիքում մի  քանի անգամ գրավել են մարտավարական մի քանի կետեր։ Դրանից հետո, սեպտեմբերի 13-ին նրանց գործողություններն օղակի սեղմումն է ՀՀ-ի շուրջը՝ ստիպել, որպեսզի Հայաստանը միջանցք տրամադրի թուրք-ադրբեջանական տանդեմին»,- ասաց նա։

Օհանյանի խոսքով՝ պարտված իշխանությունները միշտ գտնվում են ճնշումների և պարտադրանքի ներքո, միջազգային հարթակներում մշտապես կոմպլեքսավորված վիճակում են, այդ թվում ՝ բանակցային գործընթացներում։

«Մեր խնդիրը պարտված իշխանություններին հեռացնելն է։ Մեր խնդիրը բանակցողին, որը միջազգային հարթակում ներկայացնում է ՀՀ-ն, հեռացնելն է։ Ձեռքի ամուր բռունցքով կարող ենք Հայաստանն ու Արցախը դուրս բերել այս իրավիճակից։ ՀՀ իշխանությունների, Նիկոլ Փաշինյանին հեռացնելը մեր այսօրվա օրակարգն է»,- հայտարարեց Սեյրան Օհանյանը։

Պատգամավորը նաև տեղեկացրեց, որ ԱԺ ընդդիմադիր խմբակցությունների 35 պատգամավոր ունեն ստորագրություն՝ ՀՀ վարչապետին  և Կառավարությանն  անվստահության հայտնելու  գործընթաց սկսելու վերաբերյալ։

Նա նաև ընդգծեց, որ գործընթացն իրականցնելու համար դեռևս անհրաժեշտ է 18 պատգամավորի ստորագրություն։