Ձեր վստահելի աղբյուրը

«Երեկ ՄԱԿ-ի ԱԽ-ում տեղի է ունեցել հատուկ քննարկում՝ նվիրված մեզ հուզող հարցերին և մեր նախաձեռնությամբ որն արդեն երկրորդն է»,-կառավարության նիստում Նիկոլ Փաշինյանի առաջաչկով ՄԱԿ-ի ԱԽ քննարկման արդյունքները ներկայացրեց Արարատ Միրզոյանը:

Նա հիշեցրեց, որ երկու օր առաջ էլ էր տեղի ունեցել քննարկում՝ փակ ռեժիմում, և երկրորդը ՀՀ-ի պնդմամբ արդեն բաց ռեժիմում է անցկացվել, որպեսզի ողջ աշխարհի մարդկությունը կարողանա հետևել մշտական, ոչ մշտական անդամ երկրների տարբեր դիրքորոշումներին:

Ըստ Միրզոյանի՝ թեև քննարկման արդյունքներով փաստաթուղթ առայժմ չի ընդունել, բայց այն որևէ կերպ չպետք է նսեմացնի տեղի ունեցած քննարկման կարևորությունը, որովհետև նույնիսկ առանց փաստաթղթի միջազգային հանրությունը շատ հստակ դիրքավորվել է հարցերի շուրջ:

Նա թվարկեց կարևոր թեզերը՝ ասելով, որ երկրների ճնշող մեծամասնությունն ընդգծել է ուժի կիրառման անթույլատրելիությունը, Հայաստանի սուվերեն տարածքի անձեռնմխելիությունը, մինչև ներխուժումը տեղի ունեցած դիրքեր վերադառնալու անհրաժեշտությունը:

««Ագրեսիա» եզրույթը բազմիցս է օգտագործվել, այսինքն՝ շատ հստակ ընկալում կա, որ սա ագրեսիա է, ներխուժում ՀՀ տարածք, որ թիրախավորվել են քաղաքացիական ենթակառուցվածքներ, որ ներխուժողը պետք է վերադառնա ելման դիրքեր: Ավելին ասեմ՝ բազմաթիվ երկրներ քննարկումներում խոսել են նաև ԼՂ հակամարտության, ԼՂ հիմնախնդրի մասին, և, ըստ էության, չափազանցրած չեմ լինի, եթե ասեմ, որ Ադրբեջանի ղեկավարության թեզը, որը նրանք փորձում են շրջանառել մեկ տարի և ավելի, որ այլևս ԼՂ հիմնախնդիր և ԼՂ չկան, երեկ իր համարժեք հակառակ արձագանքը ստացավ միջազգային հանրության կողմից»,-տեղեկացրեց Միրզոյանը և շարունակեց. «Անշուշտ, հարկ է գնահատանքի խոսքեր ասել այն երկրների մասին, որոնք համարձակորեն դադարել են այլևս հավասարության նշան դնել ագրեսորի և ագրեսիայի թիրախի միջև, բայց նաև պետք է խոստովանեմ, որ առանձին երկրների կամ երկրի դեպքում ունենք մի փոքր ավելի ակնկալիքներ, և թերևս նաև գաղտնիք չէ, որ որոշ դեպքերում այդ ակնկալիքները ոչ այնքան արդարացան»: