Ձեր վստահելի աղբյուրը

«Այս ընթացքում Նիկոլ Փաշինյանն արդեն ապացուցել է, որ աշխատում է  Հայաստանի շահերի դեմ, իր  գործունեությամբ կամ անգործությամբ Հայաստանին նոր պատերազմի մեջ ներքաշեց՝  թողնելով նրան անպաշտպան»,- կառավարության մոտ լրագրողների հետ զրույցում ասաց հասարակական-քաղաքական գործիչ Ավետիք Չալաբյանը։ 

Նա նշեց, որ եթե հայկական բանակը հերոսաբար չդիմադրեր, անհամաչափ կորուստներ  չհասցներ թշնամուն, մենք այսօր կարող է արդեն Սյունիքը կորցրած լինեինք. «Մեր բանակի  հերոսական դիմադրությունն է,  որ թշնամուն հետ է շպրտել  Ջերմուկից։ Թշնամին եղել է Ջերմուկից 1,5 կմ  վրա։ Հիշեք՝ թշնամին սեպտեմբերի 14-ին եղել է  1,5 կմ վրա, հիմա գտնվում է 7 կմ վրա։ Մեր դիտարկումները  ցույց են տալիս, որ  մոտավորապես 5 կմ  նահանջել է այն դիրքերից, որին եկել, հասել էր, և դա մեր բանակի  հերոսական դիմադրությունն է։ Բայց այս իշխանությունն  իր գործունեությամբ էլի բերել է այն վիճակին, որ Հայաստանը մնացել է մենակ, անպատրաստ։ Պետք է այս իշխանությունը փոխարինեք»,- ասաց Չալաբյանը։

Նա ընդգծեց՝ չպետք է ունքը սարքելու փոխարեն աչքը հանեն։

«Եթե  այս դժվար պայմաններում ուզում ես իշխանությունը փոխարինել այլ՝  ավելի գործունյա, արդյունավետ իշխանության, սկզբից պետք է այդ  իշխանությունը ձևավորես փողոցում։ Դա պետք է լինի ոչ միայն հանրահավաքների, նաև կազմակերպված կառույցների տեսքով։ Հիմա աշխատում ենք դրա  վրա, որպեսզի այդ կազմակերպված կառույցները ձևավորենք։ Հեշտ չէ, արագ չէ, որովհետև  ունենք պետություն, միշտ ունեցել ենք պետություն, բայց այս խունտան  պետությունը գրավել է, այն դարձրել է ոչ արդյունավետ։ Դրա այլընտրանքը պետք է ստեղծել հնարավորինս արագ։ Մեր պայմաններում դա հեշտ չէ, քանի որ ընդդիմության տարբեր թևերն  իրար հետ բավարար չեն համագործակցում, որովհետև նաև մեր բնակչությունն է զգալի չափով պառակտված։

Խնդիրների շան  գլուխը թաղված է հենց այդտեղ։ Ո՞րն է լինելու այն արդյունավետ լուծումը, որը կաշխատի, մեր վիճակն  էլ ավելի չի վատթարացնի, որովհետև եթե գա նոր իշխանություն, որը ժողովրդի  աջակցությունը չունի, կամ  գա նոր իշխանություն, որն իր ներսում գզվրտում է, արտաքին կողմերը չեն ընդունի՝ համարելով  ոչ լեգիտին, մեր վիճակն էլ ավելի կվատթարանա։
Դրա համար պետք է  համբերությամբ լցվել»,- ասաց քաղաքական-հասարակական գործիչը։

Նա հայտնեց, որ ամբողջ օրն անընդհատ հանդիպումների մեջ են, փորձում են գտնել այն մարդկանց, որոնք բարձր հեղինակություն ունեն, ընդունակ են լուծումի, համագործակցության մաս կազմել, ընդունակ են թև-թիկունք տալով՝ աշխատել. «Փորձում ենք համախմբել, ինչքան ժամանակ  կտևի, չգիտենք, կարող է վաղն արդյունք ունենալ  կամ մեկ շաբաթից, բայց ժամանակը սահմանափակ է,  քանի որ Ադրբեջանը  նոր հարձակում է  պատրաստում։ Մեզ պետք է ամեն ինչ անել այդ հարձակմանը դիմագրավելու համար»։