Ձեր վստահելի աղբյուրը

«Ադրբեջանի ագրեսիայի հետևանքով Վայոց ձորում վնասվել են մասնավորապես հյուրատներ, առողջարան, ջրամբար,Կեչուտի ջրամբար է երկու արկ ընկել, ճոպանուղի, ՓԾ հրշեջ-փրկարարական ջոկատի շենքը, նաև բնակիչների գույք»,-գործադիրի նիստում զեկուցեց ԱԻ նախարար Արմեն Փամբուխչյանը:

Նրա ներկայացմամբ՝ Սյունիքի մարզում ռմբակոծության հետևանքով էլեկտրամատակարարման գծերի հետ խնդիրներ կան, վնասվել են շտապօգնության մեքենաներ:

Հայտնելով որ Գեղարքունիքի մարզում հիմնականում վնասվել են բնակելի տները և ցորենի ու գարու արտերը՝ նախարարան ասաց. «Սոթքում 55-60 տուն է  վնասվել, անասնագոմեր, գազամատակարարման բազմաթիվ խողովակներ են վնասվել և մի շարք մասնավոր մեքենաներ»:

Նիկոլ Փաշինյանը հավելեց, որ կառավարությունը պետք է համապատասխան միջոցներ տրամադրի՝ լիարժեք վերականգնողական աշխատանքներ իրականացնելու համար:

ՄԻՊ Քրիստիննե Գրիգորյանն էլ տեղեկացրեց, որ քաղաքացիական ենթակառուցվածքներից զատ ադրբեջանական ագրեսիայի շրջանակում թիրախավորվել է հենց քաղաքացիական բնակչությունը:
«Մենք արձանագրել ենք մեկ քաղաքացիական անձի մահ, որը վրա է հասել բեկորային վնասվածքից: Նա որևէ զինված ծառայության մեջ որևէ կերպ ներգրավված չի եղել. դրա վերաբերյալ կան ապացույցներ»,-տեղեկացրեց ՄԻՊ-ը:

Գրիգորյանն հայտնեց, որ ՄԻՊ գրասենյակը արձանագրրել է 6 վիրավորում ստացած քաղաքացիական անձի վերաբերյալ տվյալ, որոնց նույնականացրել ենք, և այդ ամենը ներկայացրել ԱԳՆ-ին:

«Բացի շտապօգնության տրանսպորտային միջոցներից ու անձնակազմից, թիրախավորվել են նաև լրագրողներ, դրա վերաբերյալ նույնպես կան ապացույցներ, ինչը միջազգային հումանիտար ու սովորութային իրավունքի կոպտագույն խախտում է»,-նշեց ՄԻՊ-ը:

Քրիստիննե Գրիգորյանն ասաց, որ պատերազմական հանցագործությունների վերաբերյալ տեղեկատվության հավաքագրման, նույնականացման գործընթացն ամփոփվում է և զեկույց կհրապարակվի:

Արարատ միրզոյանն էլ տեղեկացրեց, որ ԱԻՆ-ի, ՄԻՊ-ի և այլ գերատեսչությունների հավաքագրած տվյալներն ուղարկվում  են միջազգային կառույցներին ու գործընկերներին: