Ձեր վստահելի աղբյուրը

Հայաստան ժամանած ԱՄՆ ներկայացուցիչների պալատի խոսնակ Նենսի Փելոսին այսօր փակ հանդիպում է ունեցել ԱԺ ընդդիմադիր խմբակցությունների հետ:

Հանդիպմանը մասնակցել են ՀՅԴ Հայաստանի Գերագույն մարմնի ներկայացուցիչ, «Հայաստան» խմբակցության պատգամավոր Իշխան Սաղաթելյանը, «Հայաստան» խմբակցության ղեկավար Սեյրան Օհանյանը, «Հայաստան» խմբակցության պատգամավորներ Վահե Հակոբյանը, Աննա Գրիգորյանը, «Պատիվ ունեմ» խմբակցության ղեկավար Հայկ Մամիջանյանը, պատգամավոր Թագուհի Թովմասյանը:

Հանդիպումից հետո լրագրողների հետ զրույցում Իշխան Սաղաթելյանն ասաց, որ ընդդիմության հետ հանդիպման առաջարկը եղել է ՀՀ-ում ԱՄՆ դեսպանատան կողմից։ 

Նա հայտնեց, որ Նենսի Փելոսիի հետ խոսել են Ադրբեջանի ագրեսիայի մասին. «Շատ հստակ փոխանցեցինք մեր դիրքորոշումը, որ Ադրբեջանը, որը շարունակում է պատերազմը, մեզ համար անընդունելի է ամերիկյան պետության աջակցությունն Ադրբեջանին։ Խոսքը ռազմաքաղաքական աջակցության մասին է։ Դրանից Ադրբեջանը դառնում է ավելի սանձարձակ ու ավելի լկտի, շարունակում է ագրեսիան Հայաստանի Հանրապետության դեմ։

Խոսեցինք 907 բանաձևի մասին և հաջորդ տարի օգնությունները դադարեցնելու անհրաժեշտության մասին։ 907 բանաձևի վերաբերյալ ասացին, որ քննարկելու են, միայն հայտարարություններով չեն բավարարվելու, վերադարձից հետո առնվազն կոնգրեսում քննարկելու են և բարձրաձայնելու այս խնդիրները։

Կոնկրետ փաստերով խոսեցինք ռազմագերիների, Հայաստանի ներքին ժողովրդավարության, Արցախի կարգավիճակի մասին։ Բոլոր խնդիրները, ինչ մշտապես հրապարակային բարձրաձայնել ենք, խոսել ենք այս փակ հանդիպման մասին»։ 

ԱԺ «Պատիվ ունեմ» խմբակցության պատգամավոր Հայկ Մամիջանյանն ասաց, որ 907 բանաձևի հետ կապված բոլոր ձևակերպումները, թե Ադրբեջանը չի հանդիսանում ագրեսոր, գոյություն այլևս չունեն. «Միջազգայնորեն և մասնավորապես ԱՄՆ կողմից ճանաչված փաստերով  ագրեսոր պետությունը հանդիսանում է Ադրբեջանը։ Կարող ենք փաստել, որ սա շատ փոփոխությունն կբեր ԱՄՆ-ում երկու կուսակցությունների համար էլ»։

Նա նշեց, որ  քննարկման հիմնական թեման եղել է ԼՂ հակամարտության խնդիրը՝  Մինսկի խմբի աշխատանքների վերսկսումը, դրանց իրական, ճիշտ ուղու վրա դնելը։

Մամիջանյանը չնշեց, թե այդ հարցի առնչությամբ Նենսի Փելոսիի կողմից ինչ արձագանք է եղել, միայն փաստեց, որ արձագանքը եղել է բարեբեր։

Ինչ վերաբերում է ներքաղաքական խնդիրներին, ընդդիմադիր պատգամավորն ասաց, որ իր ներածական խոսքում ասել է. «Փաստել, որ Հայաստանում ժողովրադավարություն է, որևէ աղերս չունի իրականության հետ։ Բայց այն փաստը, որ տիկին խոսնակը համարում է, որ Հայաստանին անհրաժեշտ է օգնել այն պատճառով, որ Հայաստանում ժողովրդավարություն է, դա կասկածի տակ դնել գոնե այս փուլում մենք չենք հերքի։ Տիկին խոսնակին ներկայացվել են բոլոր այն փաստերը, ոտնձգությունները, որոնք իրականացվում են Հայաստանում ժողովրդավարության հանդեպ։

Իրականում Հայաստանում ժողովրդավարական գործընթացների ահռելի ծավալով հետընթաց է»։