Ձեր վստահելի աղբյուրը

«Ես ոչ մի տեղ չեմ գնացել, թեմայի մեջ եմ, պայքարի մեջ են»,- սեպտեմբերի 19-ին քաղաքացիների հետ հանդիպմանն ասել է ՀՀ երկրորդ նախագահ Ռոբերտ Քոչարյանը։

Հանդիպումը փակ է եղել, այսօր «Հայաստան» դաշինքը ֆեյսբուքյան իր էջում տեսանյութ է հրապարակել՝ ներկայացնելով  այն հարցերի վերաբերյալ նախագահ Քոչարյանի պատասխանները, որոնք քաղաքացիներին ամենաշատն են հետաքրքրել։

«Հարց կարող է առաջանա՝ ինչո՞ւ դուք հարթակում չէիք, ինչո՞ւ առաջնորդի դրոշը ձեր ձեռքին չէր։

Առաջնորդի պարտավորությունն է ճիշտ գնահատել իրավիճակը, հետևություններ անել կուտակած փորձից, ճիշտ քայլերով առաջ շարժվել։

Ընտրություններից հետ վերլուծեցինք ընտրությանների արդյունքների պատճառները։ Մեր գնահատականով, առաջին պատճառն էր՝ ընտրություններում բախվեցին «արժանապատիվ խաղաղություն» թեզը և «խաղաղություն ամեն գնով» թեզը, և «արժանապատիվ խաղաղությունը» մեր բնակչության զգալի մասին ուղղակի վախեցրեց։

Իմ կերպարը, իմ ղարաբաղյան անցյալը, իմ՝ պատերազում հաղթանակ կրող առաջնորդի կերպարը վախեցրեց մեր ժողովրդի մի մեծ զանգվածի, որ կգա թասիբով, կփորձի ազգային արժեքների համար պայքարել և կարող է դա մեր գլխին ևս մեկ պատերազմ բերել։
Սա հիմնական գործոնն էր, որ ամբողջ սոցիոլոգիան խառնեց։

Գիտեք՝ ագրեսիայի, հարձակման դեպքում վախն ամենից հզոր բնազդն է, և կա երեք տարբերակ արձագանքելու հարձակմանը․ առաջինը՝ պայքարել քո կյանքի համար, երկրորդը՝ փախչել, և երրորդը՝ ենթարկվել, կամ ձևանալ, թե մահացած ես։ Հիմա սա, այսպես կոչված, կենսաբանություն է, այլ ոչ թե հոգեբանություն։ Եվ սա աշխատեց մեր ժողովրդի կոլեկտիվ պահվածքի վրա։

Երկրորդ հանգամանքը եղել է՝ ռևանշիստներ, հին–նոր, ղարաբաղցի–հայաստանցի։ 

Մենք սկսում էինք «Դիմադրության» շարժում և այս վերլուծությունը, գնահատականն ունենալով՝ որոշումը հետևյալն էր՝ փորձել այդ վախը չեզոքացնել, օրինակ, իմ կերպարն առաջին գիծ չունենալու ճանապարհով և չառաջացնել հների–նորերի արհեստական թեզի վերակենդանացում։

Այդ երկու գործոնը չեզոքացնելու համար, ես որպես Հայաստանի քաղաքացի եմ մասնակցել երթերի, բայց առաջնորդի դերը չեմ տարել։

Բավական լավ է ստացվել մեզ մոտ, ցույց ենք տվել մեր կազմակերպչական հնարավորությունները։ Մեր վերջնական նպատակին չենք հասել, բայց տեսել եք, որ Հայաստանի պատմության մեջ առաջին անգամ այսպիսի զանգվածներով այսպես երկար կազմակերպված շարժում եղավ։

Իմ բացատրությունը սա է՝ կարող եք ընդունել, կարող եք չընդունել, բայց, կարծում եմ, այս բացատրության մեջ կա, իսկապես, տրամաբանություն։

Ես ոչ մի տեղ չեմ գնացել, այսպես ասած, ուղղակի փորձել ենք այլ գործիքակազմով մասնակցել այս ամենին։

Եթե դուք տեսնում եք «Հայաստան» դաշինքի ակտիվ գործունեությունը, համոզված եղեք, որ  «Հայաստան» դաշինքի հետ ես եմ»,- ասել է Ռ. Քոչարյանը։

ՀՀ երկրորդ նախագահը նշել է, որ փորձելու են մոտակա ժամանակներում վիճակը գնահատել. «Ես չեմ ուզում ձեզ հիասթափեցնել, բայց որ մնում ենք, կամ պայքարի մեջ։ Բացատրեցի, թե ինչու առաջին գծի վրա չէի, ամբիոնի վրա չէի, կրկնեմ կարճ՝  չեզոքացնելու համար այն ամենը, ինչից ինձանից մի մասը կամ վախենում էր կամ կատեգորիկ չէր ընդունում, որովհետև քարոզչամեքենան բավական երկար ժամանակ ինձ այդպես էր ներկայացնում:

Այո, թեմայի մեջ եմ, պայքարի մեջ եմ, այո առաջնորդվելու ենք։ Բայց դա լինելու է վաղն առավոտյան, երեք ժամից, մեկ շաբաթ հետո… Շատ հեռու չէ այդ ժամանակը, բայց պետք է դա լինի  իրավիճակի ճիշտ գնահատումից հետո։ Մենք հիմա աշխատում ենք մեկ այլ ծրագրի վրա։ Չեմ ուզում փակագծերը բացել։

Հիմա փորձում ենք գնահատել իրավիճակը, արագ ենք դա անելու։ Եթե մեր ժողովուրդը թմբիրից զարթնել է, եթե վախի արձագանքը պայքարն է, ոչ թե ձևացնենք, թե մեռած ենք, չկանք,  ուրեմն պետք է սկսել այլ տեմպով, այլ կարգախոսներով և իսկապես գնալ մինչև վերջ»։