Ձեր վստահելի աղբյուրը

Ժամը 8.30-ի դրությամբ հայ-ադրբեջանական սահմանին իրադրության փոփոխություն չկա: «Եռաբլուր» զինվորական պանթեոնում լրագրողների հետ զրույցում ասաց  ՊՆ խոսնակ Արամ Թորոսյանը:

Հարցին՝ արդյոք Հայաստանի հետ սահմաններին թշնամին շարունակում է ուժեր կուտակել, իսկապե՞ս իրավիճակը ծայրահեղ լարված է, նա պատասխանեց. «Զինված ուժերը ողջ ծավալով կատարում են իրենց առջև դրված խնդիրը, աչալրջորեն իրականացնում պետական սահմանի և ինքնիշխան տարածքի պաշտպանության համար նախատեսված բոլոր խնդիրները»։

Զոհված զինծառայողների անուն-ազգանունները չհրապարակելու վերաբերյալ հարցին ի պատասխան Ա. Թորոսյանն ասաց. «ՊՆ-ն երբեք չի ասել, որ չի հրապարակելու: Մենք ասել ենք, որ առաջնորդվում ենք միայն ճշգրիտ, անսխալական տեղեկատվությամբ: Բոլոր անվանացուցակները հրապարակվելու են միայն վերջնական ճշգրտումից հետո»:

Հարցին՝ հաջողվե՞լ է ադրբեջանական խմբերին հեռացնել Ջերմուկի ուղղությամբ հայկական տարածքներից, ՊՆ խոսնակը պատասխանեց. «ԳՇ պետի կողմից առաջնագծի վերաբերալ ներկայացրած իրավիճակից հետո իրադրության  որևէ փոփոխություն տեղի չի ունեցել»:

Անդրադառնալով դիրքային հնարավոր կորուստներին, ՊՆ խոսնակն ասաց. «Բոլոր տեսակի ճշգրտման աշխատանքներ են իրականացվում՝ և նյութական, և այլ: Կորուստների ճշգրտման աշխատանքներ են իրականացվում, այդ աշխատանքների լիարժեք ավարտին ՊՆ-ն ամփոփ տեղեկատվություն կտրամադրի»:

Ա. Թորոսյանն ասաց, որ երեկ Ներքին Հանդի ուղղությամբ եղած կրակոցների հետևանքով որպես այդպիսին որևէ վնաս արձանագրված չէ։ 

Հիշեցնենք՝ սեպտեմբերի 13-ի կեսգիշերից Ադրբեջանի ԶՈՒ ստորաբաժանումները հրետանային միջոցների, ականանետերի, ԱԹՍ-ների, խոշոր տրամաչափի հրաձգային զինատեսակների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ, մասնավորապես հրետակոծման են ենթարկվել Սոթքի, Ջերմուկի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը ու սահմանամերձ բնակավայրերը, հարվածներ են հասցվել նաև քաղաքացիական ենթակառուցվածքներին։

Սեպտեմբերի 14-ի երեկոյան Անվտանգության խորհրդի քարտուղար Արմեն Գրիգորյանը հայտնել է, որ միջազգային հանրության ներգրավվածության շնորհիվ հաջողվել է ձեռք բերել հրադադարի պայմանավորվածություն։

ՀՀ ԶՈւ Գլխավոր շտաբի պետ Էդվարդ Ասրյանը սեպտեմբերի 16-ին հայտարարել է, որ Ադրբեջանի զինված խմբերը գտնվում են Ջերմուկ քաղաքի մատույցներից 4,5 կմ. հեռավորության վրա. «Այս ուղղությամբ հակառակորդն իր  հարձակողական գործողությունների արդյունքում ունեցել է որոշակի հաջողություններ և մխրճվել Հայաստանի ինքնիշխան տարածք 8,5 կիլոմետր լայնությամբ ճակատով՝ մինչև 7,5 կիլոմետր խորությամբ։

Մյուս ուղղություններում, առկա էր 5 ուղղություն, հակառակորդի զինված ուժերի ստորաբաժանումների հաջողությունները չի կարող համեմատվել Ջերմուկի ուղղությամբ նրանց մխրճման խորությունների հետ։

Սակայն կան այլ ուղղություններում 1-1,5-2 կմ մխրճման խորություններ. Ներքին Հանդի ուղղությամբ, որոշակի դիրքային առավելություն ձեռք է բերել Շորժայի ուղղությամբ, Իշխանասարի ուղղությամբ մոտ կես կիլոմետր խորությամբ հաջողություն է ունեցել»։ 

Նա նաև ասել էր. «Ջերմուկի մատույցներում գտնվում է մխրճում կատարած միայն մի խումբ՝ կտրված իր ստորաբաժանումներից։ Այն գտնվում է բլրի վրա։ Կենսունակության տեսակետից, եթե 10-12 հոգանոց խմբի ջրի, սննդի սնուցում չլինի, ապա մի քանի օրվա ընթացքում դրանց ռեսուրսները կսպառվեն, ստիպված կլինեն այնտեղից դուրս գալ»։