Ձեր վստահելի աղբյուրը

«Ես բառեր չեմ գտնում, իրենց «նագլիությունն» անցել է բոլոր թույլատրելի սահմանները»,- այս մասին «Եռաբլուր» զինվորական պանթեոնում լրագրողների հետ զրույցում ասաց 44-օրյա պատերազմում զոհված Հայկազ Մկրտչյանի մայրը` Աննա Մկրտչյանը, ում ևս այսօր առավոտյան ոստիկանները բերման էին ենթարկել։

Հիշեցնենք, որ զոհվածների հարազատները հավաքվել էին «Եռաբլուր»-ում, որպեսզի թույլ չտային Նիկոլ Փաշինյանին այցելել իրենց որդիներին շիրիմներին։ Առավոտյան կարմիր և սև բերետավորները ուժով հեռացրին ծնողներին և ոստիկանության տարբեր բաժիններ տարան։ Այժմ նրանց ազատ են արձակել և կրկին եկել են «Եռաբլուր»։

Նշենք, որ զինվորական պանթեոնում ծնողները հեռացրել էին նաև Նիկոլ Փաշինյանի, այլ  պաշտոնյաների անունից դրված ծաղկեպսակները։

Երբ լրագրողներն ասացին, որ ծաղկեպսակները նորից տարել են հուշահամալիրի մոտ, Աննա Մկրտչյանն արձագանքեց.

«Ուղղակի բառեր չեմ գտնում ասելու։ Փաշինյանը գալիս է «Եռաբլուր», որ շոու անի, ուզում է ցույց տալ, որ դա իր համար կարևոր է։ Իրենք շատ լավ գիտեն, որ իրենց այդ քայլը բացասաբար է ընդունվում ծնողների կողմից և ամեն անգամ միտումնավոր անում են, որ մեզ ցավեցնեն, հունից հանեն։ Չենք կոտրվելու, մինչև վերջ իրենց պատիժն ենք պահանջելու, իրենք իրավունք չունեն շնչեն ու քայլեն այս հողի վրա։ Հատկապես «Եռաբլուր»-ում ոտք դնելու իրավունք չունեն, իրենք ապրում են մեր տղաների արյան հաշվին, խմել են մեր տղաների արյունը և գալիս են այստեղ, որ ինչ անե՞ն, ուրախանա՞ն։ Եռաբլուրն օրեցօր մեծանում է»։

Մանրամասները՝ տեսանյութում։