Ձեր վստահելի աղբյուրը

Այսօր երեկոյան Մայր Աթոռ Սուրբ Էջմիածնում հնարավոր է կայանա ՀՀ նախկին նախագահների և Ամենայն Հայոց կաթողիկոս Գարեգին Երկրորդի հանդիպումը:

Թե ինչ սպասելիքներ կան հանդիպումից հենց եկեղեցու ներսում՝ MediaHub-ը զրուցել է Հայ Առաքելական Եկեղեցու Շիրակի թեմի առաջնորդ, Գերաշնորհ Տ. Միքայել Արքեպիսկոպոս Աջապահյանի հետ։

Panorama.am-ը հրապարակում է հարցազրույցից մի հատված.

Հարց-Ձեր կարծիքով ինչպիսի՞ լուծում կարող են գտնել եկեղեցին ու երկրի նախկին ղեկավարները։

Պատասխան-Չեմ կարող ասել, թե ինչ լուծումներ կգտնեն։

Հարց-Շրջանառվում է, որ, օրինակ, հնարավոր է երկիրը ստեղծված իրավիճակից դուրս բերող առաջնորդը եկեղեցուց որևէ Սրբազան լինի, Դուք սա հնարավոր համարո՞ւմ եք։

Պատասխան-Անհնարին ոչինչ չկա աշխարհում, ինչու չէ, հնարավոր համարում եմ։

Հարց-Առհասարակ, այս փուլում եկեղեցու դերն ինչպե՞ս եք տեսնում։

Պատասխան-Ցանկացած պատասխանատվություն, որ կհանձնեն եկեղեցուն՝ եկեղեցին կվերցնի։

Հարց-Իսկ Դուք պատրա՞ստ եք առաջնորդնել, եթե հարկ լինի։

Պատասխան-Ե՞ս, իսկ ինչո՞ւ ես։

Հարց-Իսկ ինչո՞ւ ոչ։

Պատասխան-Եթե, ինչու ոչ, ապա՝ այո, կարող եմ, ինչո՞ւ չէ։

Հարց-Ձեր կարծիքով իշխանության և եկեղեցու միջև այս անջրպետը կարո՞ղ էր նպաստել, որ այսպիսի բարդ իրավիճակում մենք հայտնվեինք ու լուծումներն այսքան ուշանան։

Պատասխան-Իհարկե, անջրպետը խանգարում է։ Եկեղեցին չի կարողանում իր ողջ հնարավորություններն օգտագործել հանուն պետականության, որովհետև իշխանությունը չի ուզում շփվել եկեղեցու հետ։

Հարց-Այսինքն, եկեղեցին ձեռքը մեկնո՞ւմ է, իշխանությունը հրաժարվո՞ւմ է։

Պատասխան-Եկեղեցին միշտ էլ ձեռքը մեկնել է, այդ ձեռքը երբեք հետ չէր էլ քաշել։ Եկեղեցին միշտ իր համար առաջնահերություն է համարել պետականության հզորացումը։ Հակառակ պետականության վերաբերունքին՝ եկեղեցու հանդեպ, լավ կամ վատ, եկեղեցին պետականության հզորացման կողմնակիցն է և միշտ աշխատում է այդ ուղղությամբ, երբեմն էլ ի վնաս իրեն։

Հարց-Այսօրվա հանդիպումը Ձեզ մոտ հույս առաջացնո՞ւմ է, որ կօգտագործեն։

Պատասխան-Հիմա ո՛չ Վեհափառն է իշխանություն, ո՛չ նախկին նախագահներն են իշխանություն։ Նրանք առաջարկ պիտի ներկայացնեն իշխանությանը, իշխանությունը կընդունի, չի ընդունի՝ այլ հարց է։ Այս իմաստով որևէ հույս, որ իշխանությունը կզարթնի և կհամագործակցի, չկա. փոքր հույս է, իհարկե։