Ձեր վստահելի աղբյուրը

«Տիգրան Ավինյանին Երևանի քաղաքապետի տեղակալի պաշտոնին առաջադրելու հարցը, գիտեք, երկար ժամանակ է քննարկվում է և կարծում եմ, որ պարոն Ավինյանը, միանալով մեր թիմին, հնարավորություն կունենանք պետական ապարատում աշխատելու ընթացքում ունեցած փորձը նաև կիրառել Երևանում և համայնքի առջև ծառացած խնդիրները համատեղ ուժերով լուծմանը»,- Երևանի ավագանու այսօրվա՝ սեպտեմբերի 23-ին, արտահերթ նիստում հայտնեց քաղաքապետ Հրաչյա Սարգսյանը:

Քաղաքապետը ներկայացրեց  օրակարգային առաջին՝ Տիգրան Ավինյանին Երևանի փոխքաղաքապետ ընտրելու հարցը՝ մինչ այդ օրակարգից հանելով 4 նախագիծ և թողնելով 19-ը:

Տիգրան Ավինյանն իր խոսքի սկզբում խնդրեց մեկ րոպե լռությամբ հարգել սեպտեմբերի 13-14-ին սահմանին զոհվածների հիշատակը, որից հետո հայտարարեց. «Նախորդ շաբաթ Հայաստանը ենթարկվեց Ադրբեջանական հերթական ագրեսիային և ստիպված եղանք կրկին մարտի դաշտում պաշտպանել մեր ինքնիշխանությունը և սահմանները»:

Ավինյանի խոսքով՝ այն ոչ թե պետք է ընկճի բոլորին, այլ սթափութայն և քրտնաջան աշխատանքի մասին հիշեցում լինի:

«Զինվորների հերոսությունը պետք է պարտավորեցնի ուժեցացնել տնտեսությունը և զինել բանակը, հզորացնել պետությունը»,-ասաց փոխքաղաքապետի թեկնածուն և հավելեց. «Ըստ էության, ներկայում մեզ համար դիմադրությունն ու պայքարը, պարզապես, այլընտրանք չունեն»:

Հայտնելով, որ «Իմ քայլը» խնբակցությունից հարցրել են, թե արդյո՞ք խնդրահարույց չէ փոխվարչապետի պաշտոնից հետո նշանակվել Երևանի փոխքաղաքապետ՝ Տիգրան Ավինյանն ասաց. «Ես վստահաբար և անկեղծորեն ուզում եմ ասել, որ անկախ նախկինում ստանձնած բարձր պաշտոնից, առաջիկա ընտրությունների հետ կապված բոլոր քննարկումներից, ինձ համար մեծագույն պատիվ է լինել իմ ծննդավայր Երևանի փոխքաղաքապետ, ծառայել քաղաքին և երևանցիներին»:

Ավինյանը շնորհակալություն հայտնեց քաղաքապետին և ավագանուն  իրեն այդ պաշտոնում աշխատելու հանրավորություն տալու համար:

Քվեարկությանը մասնակցած ավագանու 46 անդամից 44 կողմ արտահայտվեց Տիգրան Ավինյանի թեկնածությանը, երկուսը ձեռնպահ մնացին: