Ձեր վստահելի աղբյուրը

«Իմ տեղեկություններով, Ալեքսանդր Ազարյանն ուներ որոշակի առողջական խնդիրներ։ Նրան բուժում էր անհրաժեշտ և դրա համար աշխատանքից ազատվելու մասին դիմում է ներկայացրել։ Այլ պատճառ ինձ հայտնի չէ»,- Դատավորների ընդհանուր ժողովից առաջ լրագրողների հետ զրույցում ասաց Երևանի ընդհանուր իրավասության դատարանի դատավոր Արման Հովհաննիսյանը։

Հիշեցնենք, որ Վերաքննիչ քրեական դատարանի դատավոր Ալեքսանդր Ազարյանը հրաժարականի վերաբերյալ դիմում է ներկայացրել ԲԴԽ։ ԲԴԽ որոշմամբ, սեպտեմբերի 22-ից նրա լիազորությունները համարվոմ են դադարած։

Հարցին՝ մամուլի հրապարակումների համաձայն, ԲԴԽ նախագահի պաշտոնում շրջանառվում է արդարադատության նախարար Կարեն Անդրեասյանի անունը, Ա.Հովհաննիսյանն ասաց. «Ես էլ եմ մամուլից տեղեկացել, որ հնարավոր է նման նշանակում լինի։

Եթե Կարեն  Անդրեասյանն իր նախկին տրամադրվածությամբ պետք է գա, ես լավ չեմ նայում։ Եթե գալիս է արդյունավետ աշխատանք իրականացնելու, որևէ վերապահում չունեմ։

Եթե պետք է խոսեն ինչ-որ կոռուպցիոն, կլանային դատավորների մասին, ու դա մնա զուտ խոսակցություն, որևէ կոնկրետ փաստով, որևէ գնահատական, հետևանք չունենա, ապա վատ եմ նայում։ Դա բերում է միայն նրան, որ հանրության առաջ հեղինակազրկվում է դատական համակարգը։ Եթե  նախարարը նման բաներ է խոսում ու չի ներկայացնում որևէ փաստ, վատ եմ նայում»։

Ինչ վերաբերում է դատաիրավական համակարգում առկա առաջնային խնդիրներին՝ դատավորն ասաց. «Շատ են խնդիրները։ Իրական խնդիրներից պետք է խոսենք։ Իրական խնդիրներով զբաղվող մարդիկ միայն խոսում են դատավորներին պատժելու, կարգապահական վարույթ հարուցելու, վեթինգի ենթարկելու մասին։ Բայց կան իրական  շատ մեծ խնդիրներ՝ դատավորների ծանրաբեռնվածություն, հաստիքների քանակի ավելացում, սոցիալական վիճակի բարելավում։ Կան խնդիրներ, որոնք լավ կլինի կարգավորել օրենսդրությամբ»։