Ձեր վստահելի աղբյուրը

Գերմանիայի սննդի արդյունաբերությունն ամենալուրջ ճգնաժամն է ապրում Երկրորդ համաշխարհային պատերազմի ավարտից ի վեր։ Ընդ որում երկրին պարենի դեֆիցիտ է սպառնում։

«Ռիա Նովոստի» գործակալությունը ներկայացնելով Die Welt թերթի հոդվածը, նշում է՝ գերմանացի արտադրողները, որոնք զբաղվում են սառեցված և թարմ մթերքի արտադրությամբ, զգուշացնում են էներգակիրների բարձր գների պատճառով գործունեության վաղաժամկետ դադարեցման վտանգի մասին՝ կոչ անելով պետական աջակցություն ցուցաբերել։

«Գերմանիայում սննդամթերքի զգալի դեֆիցիտի վտանգ կա։ Իրավիճակն ավելի քան լուրջ է», - ասված է ոլորտի ներկայացուցիչների բաց նամակում, որը հասցեագրված է Գերմանիայի կառավարությանը։

Նամակի հեղինակները նախազգուշացրել են, որ եկամուտների հետ կապված իրավիճակն օրեցօր վատանում է, իսկ ոմանք արդեն պատրաստվում են հնարավոր սնանկացմանը:

«Սննդի արդյունաբերությունը բախվում է Երկրորդ համաշխարհային պատերազմի ավարտից ի վեր իր ամենալուրջ ճգնաժամին», - ասվում է գերմանական արդյունաբերական մի շարք ասոցիացիաների կողմից հրապարակված նամակում։

Հեղինակների կարծիքով՝ ֆինանսական աջակցության բացակայությունը շուտով կարող է հանգեցնել սուպերմարկետների ու խանութների դարակների դատարկմանը։ «Գործեք հիմա, այլապես Գերմանիայի բնակչության սառնարաններն ու սառցարանները շուտով դատարկ կմնան», - ասվում է ուղերձում։