Ձեր վստահելի աղբյուրը

Սիրիան Աստանայի գործընթացը (Ռուսաստանի Դաշնության, Իրանի և Թուրքիայի մասնակցությամբ) կենսունակ է համարում, սակայն Անկարային կոչ է անում «ավելի լրջորեն» վերաբերվել այդ ձևաչափով ստանձնած պարտավորություններին։ Այս մասին «Ռիա Նովոստի» գործակալությանն ասել է Սիրիայի ԱԳ նախարար Ֆեյսալ Միքդադը։

«Մեր ընկերները՝ ինչպես Ռուսաստանը, այնպես էլ Իրանը, շատ լավ գիտեն մեր կարիքները։ Նրանք միշտ պաշտպանել են մեր պահանջները. Իմ կարծիքով, նրանք կանգնած են ճիշտ կողմում, և Սիրիան աջակցում է Աստանայի գործընթացին։ Ինչո՞ւ, որովհետև սա միակ կենսունակ ձևաչափն է, որի շրջանակներում հաջողվել է հասնել իրական արդյունքների։ Շատ ձեռքբերումներ հնարավոր են դարձել Աստանայի գործընթացի շնորհիվ»,- ասել է Միքդադը Նյու Յորքում ընթացող ՄԱԿ-ի Գլխավոր ասամբլեայի բարձր մակարդակի շաբաթվա շրջանակներում։

Նախարարի խոսքով՝ Սիրիան Անկարային կոչ է անում «ավելի լրջորեն վերաբերվել իր պարտավորությունների կատարմանն» այս ձևաչափի շրջանակներում։ «Սա միակ խնդիրն է, որին մենք բախվում ենք։ Կարծում ենք, որ մեր բարեկամների՝ ռուսների և իրանցիների ջանքերը ճիշտ ուղղությամբ են գործադրվում», - ասել է նախարարը։

Սիրիայի ԱԳՆ ղեկավարը նաև գործակալությանը հայտնել է, որ ՄԱԿ-ի Գլխավոր ասամբլեայի շրջանակներում ոչ մի հանդիպում չի ունեցել իր թուրք գործընկեր Մևլութ Չավուշօղլուի հետ, և ներկայումս երկրների միջև հարաբերությունները կարգավորելու համար երկխոսություն իրականում չկա։

«Բանակցություններ չկան, շփումներ չկան, ոչինչ չկա՝ գոնե արտգործնախարարների մակարդակով»,- ընդգծել է նախարարը։