Ձեր վստահելի աղբյուրը

Փաստ է՝ Հայաստանի Հանրապետությունը գտնվում է կապիտուլյացիոն վիճակում և  հենց այնպես չի հայտնվել այս վիճակում: Այս մասին «Եռաբլուր» զինվորական պանթեոնում լրագրողների հետ զրույցում ասաց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանն՝ անդրադառնալով Հանրային հեռուստաընկերության եթերում ՀՀ առաջին նախագահ Լևոն Տեր–Պետրոսյանի այն հայտարարություններին, թե Հայաստանին սպասվում են ծանր լուծումներ։

«Վերջին տարիների մեր պատմությունը ցույց տվեց՝ իշխանության եկան մարդիկ, որոնք ձախողեցին ամեն ինչ, այդ թվում՝ բանակցային գործընթացը: 30 տարիների քրտնաջան աշխատանքը բերել էր ինչ-որ մի բանակցային ներուժի ձևավորման, որի վրա հենվելով կարող էինք շարունակել մեր պատմությունը, բայց այդպես չստացվեց: Այդ ձախողումն է, որ բերեց պատերազմի, ունեցանք զոհեր»,- նշեց նա։

Սեյրան Օհանյանի խոսքով՝ զոհերի զգալի մասը կարող էր չլինել, եթե պետությունը թիկունք կանգներ բանակին, ապահովեր անվտանգություն, նաևմարտական գործողությունների խորքում ինժեներական սարքավորումներով կահավորեր, պաշտպանական բնագծեր կահավորել:

«Երկրորդը, մենք կարող էինք ավելի շատ զոհեր ունենալ, բայց ունենալ հաղթանակ: Մեր ցավը նրանում է, որ մենք այս քանակի զոհերի պայմաններում ունեցել ենք պարտություն: Այս իշխանությունները պարտությունից, կապիտուլյացիայից հետո ամբողջությամբ տապալել են արտաքին քաղաքականությունը, պաշտպանական քաղաքականությունը, բանակաշինությունը, տապալել են պետական կառվարումը:

Իհարկե, հետպատերազմյան շրջանում՝ 2020 թվականի նոյեմբերի 9-ն ստորագրված հայտարարությունից հետո անհաջողությունների գործընթացները շարունակական են դարձրել: Այս պայմաններում նոյեմբերի 9-ի և մնացած փաստաթղթերը փաստացի կնիքն են նրա, ինչ այսօրվա իշխանությունները կատարել են»,- ընդգծեց Սեյրան Օհանյանը:

Նրա խոսքով՝ ներկայիս իշխանությունները գտնվում են ճնշման, պարտադրման ներքո։ Ուստի, ըստ նրա, այս վիճակից դուրս գալու առաջին կարևոր պայմանն այն է, որ պետք է փոխել իշխանությունը։

«Գան մարդիկ, գա իշխանություն, որը կարող է արտաքին քաղաքականություն վարել, և մեր ներքին ազգային երաշխիքները ձևավորել՝ բանակաշինություն և այլն: Արտաքին քաղաքականության մեջ փաստ է, որ պարտված իշխանությունը ճնշման ներքո է գտնվում, այսինքն՝ մեր բանակցողը մշտապես ճնշման ներքո է և այս պարագայում ամենակարևոր խնդիրը  բանակցողին փոխելն է»,- ասաց Սեյրան Օհանյանը:

Անդրադառնալով Լևոն Տեր-Պետրոսյանի այն հայտարարությանը, թե բանակցողին փոխելը ոչինչ չի տալու, քանի որ վիճակը ծանր է,  պատգամավորն արձագանքեց. «Այն, որ իրավիճակը ծանրագույն է, հասկանալի է: Դե եկեք հանդուրժենք, նայենք, թե այս իշխանությունները ոնց են ամեն ինչ տանում մեր անկախության վերջնական փլուզման»։

Մանրամասները՝ տեսանյութում։