Ձեր վստահելի աղբյուրը

«Պետք է վերագնահատենք մեր անվտանգային ճարտարապետությունը, պետք է շատ սթափ գնահատենք՝ որ պետությունները կարող են ազդել Ադրբեջանի և Թուրքիայի վրա։ Պետք է գնահատենք, որ այդ ազդեցության լծակները Ռուսաստանի և ՀԱՊԿ-ի կողմից շեշտակի նվազել են»,- ասուլիսում ասաց ՀՀ երկրորդ նախագահ Ռոբերտ Քոչարյանը։

Նրա խոսքով, ՀԱՊԿ-ի բոլոր երկրներն Ադրբեջանի հետ շատ ավելի լավ հարաբերություններ ունեն՝ միջպետական, անհատական մակարդակի վրա, քան Հայաստանը, և մտածել, որ ՀԱՊԿ-ը կարող է քայլեր ձեռնարկել, աշխարհաքաղաքական անմեղսունակություն է։ 

Ըստ Ռ.Քոչարյանի, ակնհայտ է, որ ՌԴ-ն անում է, անելու է ամեն հնարավորը, որ բախում չլինի Հայաստանի և Ադրբեջանի միջև, բայց դրանք լինելու են քաղաքական, դիվանագիտական քայլեր։

«Այսօր ՌԴ-ն ունի դաշնակցային հարաբերություններ Ադրբեջանի հետ, մտածել, որ այս վիճակում ՌԴ-ն կարող է ռազմական գործողություններ սկսել Ադրբեջանի հետ, անհեթեթություն է, չի լինելու»,- նշեց ՀՀ երկրորդ նախագահը։

Այդ տեսանկյունից, ըստ նրա, բավական լավ  վիճակ է ստեղծվել Հայաստանում հակառուսական տրամադրությունները զարգացնելու համար. «Հակառուսական տրամադրությունների պուլտն այսօր Ալիևի ձեռքին է, երբ ուզի միացնի, մի ալիք ևս գնալու է. մի քանի  պոստ, երկու տասնյակ զոհ, խնդրեմ՝ հակառուսական տրամադրությունների ևս մեկ ամսվա ալիք»։

Ռ.Քոչարյանը նշեց, որ Հայաստանի  ամենից թույլ տեղը Սյունիքն է, նաև սա այն տարածքն է, որի նկատմամբ ամենից մեծ ցանկություններն են արտահայտվում Թուրքիայի և Ադրբեջանի կողմից, և դա արվում է բացահայտ։

«Կոնկրետ հարց՝ բացի Հայաստանից ո՞ր երկրի համար է Սյունիքը կարևոր։ Իրան։ Սա դժվա՞ր էր կռահել։ Եթե մենք ուզում ենք ունենալ պետություն, որը բացի հայտարարություններից և հորդորներից կարող է գործնական քայլերի դիմել՝ զուտ շահերի համադրությամբ, Իրանն է։

Այս երկու տարվա ընթացքում գրեթե ոչինչ չարվեց այդ ուղղությամբ, առնվազն մի երկու զորավարժություն պետք է անեինք Իրանի հետ Սյունիքում, որոշ իրավապայմանագրային բազա պետք է լիներ, և դա ամենից մեծ զսպող հանգամանքը կլիներ Ադրբեջանի համար, որովհետև Իրանն այն պետությունը չէ, որի վրա մատ թափ տալով կարելի է կանգնեցնել, եթե ինքը հետապնդում է իր ազգային շահը։

Ես գիտեմ, որ նման խոսակցություն իրանական կողմի հետ եղել է 2021թ․ մայիսին, բայց հետո հայկական կողմն այդ թեման ուղղակի սառեցրեց, և շարունակելու համար որևէ քայլ չարեց։ Առաջարկն էլ, ի դեպ, մերը չի եղել։ Հիմա էլ ուշ չի։ Այստեղ մենք պետք է որոշ վճռական քայլերի գնանք»,- ասաց Ռ.Քոչարյանը։ 

Երկրորդ նախագահի համոզմամբ, ՀԱՊԿ-ից դուրս գալը ևս մեկ հիմարություն կլինի։

«ՀԱՊԿ-ի շրջանակում կան պայմանագրեր, որոնք շատ կարևոր են զենք-զինամթերք գնելու համար։ Պետք է որոշ վճռական քայլերի գնանք՝ գիտակցելով, որ, այո, պետք է համոզել Ռուսաստանին մեր անվտանգության համակարգը համալրել նոր կոմպոնենտներով։ Ես համոզված եմ, որ հնարավոր է դա բացատրել ռուսական կողմին, միգուցե, եռակողմ մի նոր ֆորմատ ձևավորել, քանի որ շահերը համընկնում են, և այսօր Ռուսաստանն Իրանի հետ բավականաչափ ջերմացնում է հարաբերությունները։ Համոզված եմ նաև, որ սա հնարավոր է բացատրել նաև Միացյալ Նահանգներին։ Դո՞ւր կգա իրենց՝ ո՛չ։ Առաջարկու՞մ են այլընտրանք։ Չեն առաջարկում։ Իմ կարծիքով, սա այն վիճակն է, երբ պետք է ավելի համարձակ լինել ոչ միայն ներսում, այլ նաև դրսի հետ հարաբերություններում»,- ասաց Ռոբերտ Քոչարյանը։

Հարցին՝  արդյո՞ք պետք է կոնկրետ ընտրություն կատարել Ռուսաստանի և հավաքական արևմուտքի միջև, թե՞ պետք է տարբեր ուղղություններով աշխատել, ՀՀ երկրորդ նախագահ Ռոբերտ Քոչարյանը պատասխանեց.

«Ակնհայտ է, որ կոմպլեմենտարության կորիդորը շեշտակի նեղացել է, բայց դա չի նշանակում, որ չպետք է շփվել Արևմուտքի հետ։ Այո, պետք է շփումները շարունակել։

Սցենարներ. եթե Ռուսաստանը թուլացած դուրս գա այս պատերազմից, ակնհայտ է, որ իր ազդեցությունը Թուրքիայի ու Ադրբեջանի վրա շեշտակի նվազելու է և այդ երկու երկրների ազդեցությունը տարածաշրջանում մեծանալու է։ Դա մեր շահերից չի բխում։ Եթե ուժեղացած դուրս գա, ուրեմն Ալիևը չի համարձակվելու ասի՝ ով ուզում է ինձ զանգի, ինչը հիմա ասում է, ասում է նաև այս իրավիճակից ելնելով»։