Ձեր վստահելի աղբյուրը

ԱԺ նախագահ Ալեն Սիմոնյանը, որը պաշտոնական այցով հոկտեմբերի 9-ին մեկնելու է Մոսկվա, ԱԺ-ում լրագրողների հետ ճեպազրույցում հայտնեց, թե ինչ հարցեր է քննարկելու այնտեղ։

«Քննարկելու եմ ՀԱՊԿ-ի հետ կապված հարցերը, Հայաստան-Ռուսաստան փոխօգնության մասին պայմանագրի հետ կապված  հարցերը, որով Հայաստանը դիմել է և մինչ օրս պատասխան չունենք, նույնիսկ «չէ» չունենք»,- ասաց նա։

Հարցին՝ կարո՞ղ է եկել է ՀԱՊԿ-ից դուրս գալու ժամանակը», Ալեն Սիմոնյանն ասաց. «Գիտեք ինչ, եկեք այդ հարցին ես չպատասխանեմ, որովհետև շատ հնարավոր է, որ ՀԱՊԿ-ն, ընդհանրապես,  որոշում կայացնի դուրս գալ Հայաստանից: Որովհետև եթե այդ կառույցը պատշաճ արձագանք չի տալիս, ես մնում եմ իմ կարծիքին, որ մենք պետք է շատ երկար մտածենք ու հասկանանք:

Բայց միաժամանակ սա խաղուպար չէ, որ մենք արագ կտրուկ շարժումներ անենք՝ առանց հասկանալու, թե հետո ինչ ենք անելու և դրան ինչ է հետևելու: Բայց այն, որ այո, խնդիր կա, միանշանակ է, այդ  մասին ես խոսելու եմ և պնդելու եմ իմ հայտարարությունները»։

Պատասխանելով հարցին՝ ՌԴ-ն ցանկանում է, որ Հայաստանը միութենական պետության մաս դառնա կամ ՌԴ մաս,  քիչ առաջ նման հրապարակում է արել Նիկոլ Փաշինյանի ընտանիքին պատկանող «Հայկական ժամանակը», կա՞ արդյոք Ռուսաստանից հնչող նման պահանջ, պարտադրանք, Ա. Սիմոնյանն ասաց. «Նման որևիցե խոսակցության ես իմ ռուս գործընկերների հետ ականատես չեմ եղել: Նման խոսակցություն չկա, ինձ համար չի էլ կարող լինել: Հայաստանի անկախությունը, Հայաստանի ինքնիշխանությունը քննարկման ենթակա չեն: Բացառում եմ, որ նման բան լինի, ու ես չիմանամ»:

Հարցին՝ հավաստի չի՞ համարում այդ աղբյուրը, նա պատասխանեց. «Չէ, չեմ համարում, քանի որ ես նման ինֆորմացիա չունեմ»։