Հայաստանի ընտրական համակարգը վերջին 25 տարիներին անընդհատ զարգացել է. Հովակիմյան
Ազգային ժողովում ընթանում է արտահերթ նիստը, որի օրակարգում ԿԸՀ նախագահի և անդամների ընտրության հարցն է: «Քաղաքացիական պայմանագիր» խմբակցությունը Կենտրոնական ընտրական հանձնաժողովի նախագահի պաշտոնում առաջադրել է Վահագն Հովակիմյանի, իսկ անդամների պաշտոնում Աննա Գրիգորյանի, Ժիրայր Կարապետյանի, Նունե Հովհաննիսյանի, Սիլվա Մարկոսյանի, Արմեն Սմբատյանի և Արուսյակ Տերչանյանի թեկնածությունները։
«Մեր երկրի պես սահմանափակ ռեսուրս ունեցող պետությունների զարգացումը, հզորացումը, հնարավոր է մեկ ճանապարհով, այդ ճանապարհը ժողովրդավարությունն է: Ես համոզված եմ՝ ժողովրդավարությունը մեր երկրի համար ունի կենսական նշանակություն»,- իր ելույթում ասաց Հովակիմյանը։
Նա նշեց, որ ժողովրդավարական զարգացման համար անկյունաքարային նշանակություն ունի ազատ, արդար, թափանցիկ և մրցակցային ընտրությունները. «Չկա ազատ, արդար, թափանցիկ և մրցակցային ընտրություն՝չի կարող լինել ժողովրդավարություն:
Ժողովրդավարական զարգացման, ասել է թե՝ ազատ, արդար, թափանցիկ, մրցակցային ընտրությունների դեմ ցանկացած ոտնձգություն, դա ոտնձգություն է Հայաստանի դեմ, մեր պետության, ինքնիշխանության, մեր երեխաների՝ ժողովրդական, սոցիալական և իրավական պետությունում երջանիկ ապրելու ապագայի դեմ»:
Հովակիմյանի խոսքով, Հայաստանում ընտրական համակարգը վերջին 25 տարիներին անընդհատ զարգացել է, վերջին տարիներին առավել քան առաջընթաց է ապրել՝ ի շնորհիվ ՀՀ քաղաքացիների, քաղաքական ուժերի, ՀՀ-ում դիտորդական իրականություն իրականացնող դիտորդական առաքելությունների, գործող և պաշտոնավարումն ավարտող ԿԸՀ-ի շնորհիվ:
ԿԸՀ նախագահի թեկնածուն իր ելույթում առանձնացրեց 3 ուղղություն, որով պետք է իրականացնել ընտրական բարեփոխումների գործընթացը. «Առաջին՝ ընտրական բարեփոխումների առանցքում պետք է մնա ընտրական գործընթացների թափանցիկության էլ ավելի զարգացումը, որպեսզի ՀՀ քաղաքացին կասկած չունենա, թե իր քվեն «կորելու է»։ Երկրորդ ուղղությունը՝ ընտրական համակարգի թվայնացման շարունակումն է, որը կնպաստի ընտրական համակարգն ավելի մատչելի և հասնելի դառնա:
Երրորդ խնդիրը ընտրական ցուցակների շուրջ ծավալված բանավեճի հանգուցալուծումն է։ Կարող է լուծվել Հայաստանի պետական կառավարման համակարգի թվայնացման շնորհիվ, դրա արդյունքում հնարավոր լինի ճշգրտել ընտրական ցուցակները»։
Հարակից հրապարակումներ`
- ՀԿ-ները դեմ են ԿԸՀ-ի նոր կուսակցականացմանը
- Մի քանի ՀԿ-ներ պահանջում են վերանայել Վահագն Հովակիմյանի առաջադրումը
- ՔՊ-ի թեկնածուն՝ ԿԸՀ նախագահի պաշտոնում