Ձեր վստահելի աղբյուրը

ԱՄՆ պաշտպանության փոխնախարարի օգնական Սաշա Բեյքերը և Հունաստանի ազգային պաշտպանության փոխնախարար Նիկոլաս Չարդալիասը Վաշինգտոնում կայացած հանդիպմանը քննարկել են Հունաստանի տարածքում ԱՄՆ ռազմական ներկայության ընդլայնման հարցը: «Ինտերֆաքս»-ը գրել է, որ այդ մասին հայտնել է Պենտագոնը։

«Կողմերը կիսել են իրենց տեսակետները Սուդայի ծոցում և Հունաստանի այլ շրջաններում Միացյալ Նահանգների ռազմական ներկայության ընդլայնման վերաբերյալ: Այն դիտարկվում է որպես Դաշինքի աջակցության ուժեղացման միջոց՝ հատկապես Արևելյան Միջերկրականում, Բալկաններում և Սև ծովում, ինչպես նաև ՆԱՏՕ-ի հարավային ուղղությամբ»,-ասված է հաղորդագրությունում։

Նշվում է, որ երկու երկրների պաշտպանության նախարարությունների ներկայացուցիչները քննարկել են Ալեքսանդրապոլիսի նավահանգստի կարևոր դերը ՆԱՏՕ-ի արևելյան կողմ հուսալի մուտք ապահովելու գործում, հատկապես՝ Ուկրաինային օգնելու համար:

Ըստ Պենտագոնի տարածած հաղորդագրության՝ Բեյքերը կոչ է արել հետագա երկխոսություն սկսել Հունաստանի և Թուրքիայի միջև՝ Էգեյան և Արևելյան Միջերկրական ծովում լարվածությունը նվազեցնելու և կայունությունը պահպանելու համար:

Ինչպես այս տարվա օգոստոսին հայտնել էր The New York Times-ը, Հունաստանի իշխանությունները ԱՄՆ-ին են հանձնել Ալեքսանդրուպոլիս նավահանգիստը, որն այժմ օգտագործվում է որպես ծանր զինամթերքի պահեստավորման բազա։

պարբերականը գրել է, որ անցյալ տարվանից ԱՄՆ-ի կողմից այս նավահանգստում տեղակայված ռազմական տեխնիկայի քանակն աճել է գրեթե 14 անգամ։