Ձեր վստահելի աղբյուրը

Ռուսաստանի Դաշնության նախագահ Վլադիմիր Պուտինը Ղազախստանի մայրաքաղաք Աստանայում գումարված Ասիայի փոխգործության և վստահության միջոցների 6-րդ համաժողովի շրջանակներում հանդիպել է Թուրքիայի նախագահ Ռեջեփ Թայիփ Էրդողանի հետ:

Ermenihaberi-ի փոխանցմամբ՝ հանդիպումն անցել է մամուլի համար փակ ռեժիմով՝ տևելով 1.5 ժամ:

Նախքան փակ հանդիպումը, երկու նախագահները կարճ զրույց են ունեցել: Էրդողանը իր խոսքում անդրադարձել է ռուսական «Ռոսատոմ» պետական կորպորացիայի նախագծով Թուրքիայի Մերսին քաղաքում կառուցվող «Աքքույու» ատոմակայանի հարցին: Էրդողանի խոսքերով, ատոմակայանի կառուցումը Մերսինում կարող է բավարարել Թուրքիայի  էլեկտրաէներգիայի պահանջարկի 10 տոկոսը:  Իսկ երկրորդ ատոմակայանի կառուցումը կարող է բավարարել Թուրքիայի էլեկտրաէներգիայի պահանջարկի ևս 10 տոկոսը: (Երկրորդ ատոմակայանը նախատեսվում է կառուցել Թուրքիայի Սինոփ քաղաքում):

Անդրադառնալով «հացահատիկի միջանցքի» հարցին, Էրդողանը նշել է, որ Անկարան  վճռական է ուժեղացնել Ստամբուլում այս հարցում ձեռք բերված համաձայնությունը: 

Euronews-ն էլ գրում է, որ ենթադրվում էր՝ Ռուսաստանի և Թուրքիայի նախագահների զրույցի հիմնական թեմաներից մեկը կրկին լինելու է Ուկրաինան, սակայն այս անգամ Վլադիմիր Պուտինն ավելի շատ կենտրոնացել է գազի արտահանման քննարկման վրա։

«Կա հետաքրքրություն Թուրքիայի և այլ երկրներում մեր պոտենցիալ գնորդների կողմից: Մենք կարող ենք դիտարկել գազատարի ևս մեկ համակարգ կառուցելու և Թուրքիայում գազի հանգույց ստեղծելու հնարավորությունը այլ երկրներին, երրորդ երկրներին, առաջին հերթին, իհարկե, եվրոպականներին վաճառելու համար: եթե նրանք, իհարկե, ներս են, դա նրանց հետաքրքրում է»,- ասել է Վլադիմիր Պուտինը։

Իր հերթին Ռեջեփ Թայիփ Էրդողանը հայտարարել է Ռուսաստանի հետ առևտրային հարաբերությունների ամրապնդման անհրաժեշտության մասին և նշել, որ հենց նրանց շնորհիվ է, որ հացահատիկի գործարքը հաջողվել է։