Ձեր վստահելի աղբյուրը

Արցախի Հանրապետության նախագահի գլխավորած պատվիրակությունը 3-4 օր է Երևանում է, հանդիպումներ են եղել ՀՀ բարձրագույն իշխանության ներկայացուցիչների հետ։ Այս մասին լրագրողների հետ ճեպազրույցում ասաց Արցախի արտաքին գործերի նախարար Դավիթ Բաբայանը, ով նույնպես պատվիրակության կազմում է։

«Երեկ հանդիպել ենք ԱԽ քարտուղարի հետ, այսօր ԱԺ նախագահի հետ, այսօր նախատեսված է նաև հանդիպում Հայաստանի նախագահի հետ, վաղը կհանդիպենք ԱԳ նախարարի և վարչապետի հետ։ Այսինքն կհանդիպենք բարձրագույն ղեկավարության այն ներկայացուցիչների հետ, որոնք զբաղված են, ներգրաված են և բանակցություններում, և Արցախի ճակատագրին անմիջական մասնակցություն ունեն»,- ասաց Բաբայանը։

Նրա խոսքով, եկել են Հայաստան՝ շատ  անկեղծ քննարկումներ իրականացնելու համար. «Ոչ միայն արցահայությունը, այլև ողջ հայությունը գտնվում է յուրահատուկ իրավիճակում, առերեսվում ենք իսկապես  գոյաբանական մարտահրավերների։ Շատ կարևոր է, որ ստանանք մի շարք հարցերի պատասխաններ, ներկայացնենք մեր տեսակետը,  տեղեկանանք տարբեր գործընթացների մասին՝  բանակցային, խորհրդարանական դիվանագիտություն, երկկողմ հարաբերություններին առնչվող։ Ազնիվ ձևով քննարկել ենք ամենաբարդ հարցերը, մեզ համար  շատ կարևոր է, որ Արցախի հարցում ունենանք հստակ դիրքորոշում»։

Անդրադառնալով Պրահայի քառակողմ հանդիպմանը և ՀՀ-ի ու Ադբեջանի միջև փոխադարձ տարածքային ամբողջականությունը ճանաչելու մասին հայտարարությանը՝ Արցախի ԱԳ նախարարն ասաց․ «Պարզաբանումներ եղան, դեռ լինելու են։ Մենք դեմ չենք, որ Հայաստանն ու Ադրբեջանը հարաբերությունները բարելավեն, սակայն պետք է հասկանանք, որ Արցախի և նաև ողջ հայության համար, կարծում եմ,  անընդունելի է Արցախը ճանաչել Ադրբեջանի մի մաս»։

Դավիթ Բաբայանի խոսքով, Հյաստանում հանդիպումների ընթացքում  եղան պարզաբանումներ, որ որևէ մեկը չի պատրաստվում Արցախը թողնել կամ ճանաչել Ադրբեջանի մաս։

«Մենք դեռ պետք է վարչապետի հետ հանդիպենք, գլխավոր դերակատարը, բնական է, վարչապետն է։ Մենք մեր կարծիքը հայտնել ենք՝  Արցախն Ադրբեջանի կազմում խցկելու ցանկացած փորձ բերելու է երկու տարբերակի՝ պատերազմի, արյունահեղության, ցեղասպանության, կամ բերելու է Արցախի հայաթափման»,- ասաց Արցախի ԱԳ նախարարը։

Դ.Բաբայանը նշեց, եթե նույն  ժողովորդավարական աշխարհը դիտում է  Արցախը որպես Ադրբեջանի մաս, նաև  իրենց վրա դաջված կլինի խայտառակության խարան, քանի որ Արցախի ցեղասպանությունը  կլինի նաև այդ քաղաքականության արդյունք։