Ձեր վստահելի աղբյուրը

«Եթե նկատել եք,  մենք վերջին շրջանում քիչ ենք օգտագործում ընդդիմություն-իշխանություն արտահայտությունը, քանի որ սա այլևս ընդդիմություն-իշխանություն պայքար չէ»,-ասաց ՀՅԴ ԳՄ անդամ, ԱԺ փոխնախագահ Իշխան Աաղաթելյանը «Երկիր մեդիա»-ի տաղավարում պատգամավոր Գեղամ Մանուկյանի հետ զրույցում։

Գեղամ Մանուկյանն ընթերցել էր քաղաքագետ Հրանտ Մելիք-Շահնազարյանի ֆեյսբուքյան գրառումն ու խնդրել մեկնաբանել այն։

«Արցախի Թեմի առաջնորդ Վրթանես եպիսկոպոս Աբրահամյանը նախօրեին կոչով է հանդես եկել՝ նշելով, որ պետք է սթափվենք և տեր կանգնենք մեր երկրին։ Վերջին օրերին բազում բարձրաստիճան հոգևորականներ անընդհատ տագնապի զանգեր են հնչեցնում։ Քարոզներ, հարցազրույցներ, կոչեր… Ակնհայտ է՝ խիստ ալեկոծ է նրանց հոգին, ուզում են ինչ-որ բան անել, օգտակար լինել, իրենց ծառառությունը բերել, բաց… Բայց կարծես խանգարող հանգամանք կա։
Ի՞նչն է խանգարում հոգևոր հայրերին։ Ի՞նչն է խանգարում մեր քաղաքական վերնախավին։ Ի՞նչն է խանգարում ազգային էլիտաներին։ Ի՞նչը։

Եվ, վերջապես, ինչու՞ չի տեղի ունենում ՀՀ ու Արցախի նախկին նախագահների և Վեհափառ Հայրապետի հերթական հանդիպումը։ Ինչո՞ւ»,-գրել էր Հրանտ Մելիք-Շահնազարյանը»,-գրել էր քաղաքագետը։

Ի պատասխան Իշխան Սաղաթելյանն արձագանեց, որ այս իրավիճակում բոլորն ունեն իրենց պատասխանատվության բաժինը։

«Մենք չենք ասում իշխանություն-ընդդիմություն, ասում ենք ազգային ուժեր։ Եկեղեցին ազգային ուժ է։ Երբ պետության գոյության հարց է  դրված, սա այլևս ընդդիմություն-իշխանություն պայքար չէ, սա այլևս գոյաբանական պայքար է։ Եվ այո, եկեղեցին այստեղ պետք է ունենա առաջնորդություն, պետք է շատ հստակ ու կոնկրետ խոսք ասի։ Եկեղեցին չպետք է վախենա Նիկոլի ֆեյքերից, սպառնալիքներից։ Պետության գոյության հարց է դրված, ընդ որում խոսքը միայն Էջմիածնի մասին չէ, Անթիլիասի մասին էլ է։ Մեր երկու վեհափառներն այս ճակատագրական փուլում պետք է շատ հստակ ու կոնկրետ խոսք ասեն ժողովրդին համախմբելու պետության շուրջ, ոչ թե Նիկոլի, հայրենիքը պաշտպանելու շուրջ։ Բոլորն ունեն պատասխանատվություն։ Որևէ մեկը չի խուսափելու պատասխանատվությունից։ Երբ Նիկոլը երկիրը տարավ կապիտուլյացիայի, այս պայքարում հաղթողներ ու պարտվողներ չեն լինելու»,-ասաց Սաղաթելյանը՝ ավելացնելով, որ պատասխանատվության իրենց բաժինն ունեն նախկին նախագահները, զինվորականությունը, եկեղեցին, նաև այն գործարարը, որն այսօր գլուխը կախ աշխատում է՝ հայտարարելով, որ քաղաքականությամբ չի զբաղվում։