Ձեր վստահելի աղբյուրը

«Վերջին տասնամյակներում միջազգային կառույցներում մենք կարողացել ենք մեր պատկերացրած ազգային շահերը, հետաքրքրություններն ավելի շատ ոչ թե առաջ մղել, ինչը  բավականին դժվար էր, այլ պաշտպանել, ցույց տալ, որ մենք դրանք ունենք, տեր ենք կանգնում այդ ազգային շահերին»,-  «Հայկական օրակարգ. Ռուսաստանի և Արևմուտքի բախման կիզակետում» թեմայով պանելային քննարկմանն ասաց ԱԺ «Հայաստան» խմբակցության պատգամավոր, ԵԽԽՎ պատվիրակության անդամ Արմեն Գևորգյանը։ 

Նրա խոսքով, 44-օրյա պատերազմից հետո իրավիճակը փոխվել է։

«Այդ պատերազմը փոխեց ոչ միայն ընդհանրապես ղարաբաղյան հիմնախնդրի  հետ կապված կոնֆիգուրացիան, ըստ էության, ավելի գլոբալ աշխարհաքաղաքական փոփոխությունների մեկնարկը տվեց։

Այդ փոփոխությունները, նկրտումները, զարգացումները տարիներ շարունակ տարբեր կենտրոններում ձևավորվում էին, հատկապես  44-օրյա պատերազմի ավարտից հետո, ըստ էության, դրանք բացահայտվեցին ու սկսեցին այսօր գալ օրակարգ»,- ասաց քաղաքական գործիչը։

Նրա կարծիքով, մենք դեռևս չենք հայտնվել կիզակետում այն պարզ պատճառով, որ, «ոնց որ ասվում է՝ հողի վրա դեռևս իրավիճակը մի քիչ ուրիշ է»։

«Խաղացողների առումով եկեք  սթափ նայել.  Արցախի Հանրապետությունում  տեղի բնակչության անվտանգությունն այսօր ապահովում են ռուս խաղաղապահները, Հայաստանում, համենայն դեպս, բոլոր առումներով՝ աշխարհաքաղաքական, տնտեսական, դեռևս որոշիչ դերակատարում ունի Ռուսաստանը, պարզապես միտումներ կան, որ այդ բալանսը, ստեղծված իրավիճակը կարող է փոխվել։

Փոխվում է՝ ոչ թե նորից կապված է մեզ հետ, այլ աշխարհում տեղի ունեցող զարգացումներով է պայմանավորված»,- ասաց Արմեն Գևորգյանը։ 

Նա նշեց, որ այսօր մեր տարածաշրջանում հիմնական զարգացումները գնում է  Ուկրաինա-ՌԴ իրավիճակով պայմանավորված և նույնն էլ, մեծ հաշվով, այսօր Եվրոպայի խորհրդում է տեղի ունենում։

«Վերջին նստաշրջանում հաջողվեց, այնուամենայնիվ, պատգամավորներին մի քիչ ավելի շահագրգռել մեր տարածաշրջանով, այն իմաստով, որ պատերազմները տարբեր չեն լինում, ունեն նույն էությանը, որոնց հետևանքով մարդիկ են մահանում, պատերազմական հանցագործություններ  են տեղի ունենում»,- նշեց ԵԽԽՎ պատվիրակության անդամը։

Նա նշեց, որ, ցավոք սրտի, վերջին տարիների զարգացումները բերում են նրան, որ պատվիրակությունների զգալի մասը Թուրքիայի և Ադրբեջանի ակտիվ մասնակցությամբ փորձում են մոռացության մատնել ղարաբաղյան հակամարտության խնդիրը, ու քննարկել Հայաստան-Ադրբեջան տիրույթում տեղի ունեցող զարգացումները, վերջին ագրեսիան։

Ա. Գևորգյանի խոսքով, պետք է իրավիճակը գնահատել իրատեսական։

«Մեր ստեղծված իրավիճակում աղետները կարող են լինել տարբեր, սկսած  նրանից, որ արդյոք մեր հասարակության մի զգալի մասն  աղետ է ընկալելու կամ չի գիտակցելու, որ կարող է Ղարաբաղը հայաթափվի, մարդ չապրի այնտեղ, վերջացրած նրանից, որ  Հայաստանի մի մասը կարող է հայտնվել այլ պետությունների  տնօրինման տակ։ Ինձ համար այդպիսի աղետներ ունենալու հեռանկաները շատ են։  Հնարավո՞ր է այդ ամեն ինչից խուսափել, թե ոչ։ Կարծում եմ, ամեն դեպքում քննարկել, նստել, կանխատեսել և ոչինչ չանել, դա ավելի է մոտցնելու աղետները, քան, այնուամենայնիվ, հասկանալ՝ ինչ կարելի է  անել, փորձել բոլորին համատեղել և  հնարավոր բոլոր ռեսուրսներն օգտագործել»,- ասաց ընդդիմադիր քաղաքական գործիչը։

Ա. Գևորգյանն ընդգծեց՝ միակ բանը, որ այսօրվա ստեղծված իրավիճակում իրեն որպես անհատի անհանգստացնում է, «արդյունքում մենք ընդհանրապես չմնանք մենակ»։

«Այս պայքարում, որը տեղի է ունենալու կամ տեղի է ունենում, բոլորն իրենց շահերն են պաշտպանում, Հայաստանը, հայկական  հարցը ինչ-որ տեղ դառնում է  յուրաքանչյուրն իր շահերը սպասարկելու կամ ամեն մեկն իր ուզածին հասնելու միջոց կամ հնարավորություն։ Այս վտանգից պետք է փորձել խուսափել, նոր դաշնակիցներ, նոր ընկերներ ձեռք չբերելով, չունենալով, հներին չկորցնենք և չհայտնվենք մի իրավիճակում, երբ պարզվի, որ ընդհանրապես մենակ ենք»,- ասաց «Հայաստան» խմբակցության պատգամավոր Արմեն Գևորգյանը։