Ձեր վստահելի աղբյուրը

Բրյուսովի անվան լեզվաբանական համալսարանի ուսանողները, դասախոսներն այս պահին բողոքի ակցիա են իրականացնում։ Նրանք երթով հասել են Հանրապետության հրապարակ՝ իրենց դժգոհությունը հայտնելու մի քանի բուհեր միավորելու կառավարության որոշման դեմ։

«Բրյուսովի ուսանողը հաղթելու է», «Մենք պահանջում ենք արդարություն», «Չենք ձուլվելու» վանկարկում են նրանք։

Բանասիրական գիտությունների թեկնածու, Բրյուսովի անվան Լեզվահասարագիտական համալսարանի դոցենտ Հրաչիկ Հակոբջանյանը լրագրողների հետ զրույցում ասաց՝ համալսարանը բարձր նշաձող է համալսարանական շարժման մեջ։

Նրա խոսքով, համալսարանի կրթության միջավայրը բարեբեր է, բազմաթիվ նորարարություններ են եղել այստեղ, արագ արձագանքել է կրթական բարեփոխումներին, բացի այդ օտար լեզուների դասաագրքերի 80-90 տոկոսի հեղինակները հենց այս համալսարանի դասախոսներն են։

«Բրյուսովը բրենդ է։ Բրենդ է նաև Երևանի, համալսարանական շարժման համար»,-ասաց Հակոբջանյանը։

Նախարարությունից երեկ համալսարանի ներկայացուցիչներին ներկայացրել են լրացված նախագիծ, սակայն, Հակոբջանյանի խոսքով, դա չի կարող համարվել նախագիծ, չկա խոսք ակնկալվող արդյունքի ու այլ հարցերի մասին։

«Փաստաթղթի հիմնական թերությունն այն է, որ ոլորտում առանց ծախս կատարելու, ներդրումներ անելու չի կարելի  ժողովրդին տալ խոստումներ որակյալ ապագայի մասին։ Միավորումը եթե տեղի ունենար գիտական հետազոտությունների, ուսումնասիրությունների արդյունքում, ապա կարելի էր հասկանալ, բայց այստեղ նման փաստարկում, հիմնավորում չկա, սա մի աղքատ, դատարկ փաստաթուղթ է»,-ասաց նա։

Հանրապետության հրապարակում ելութ ունեցողները բողոքի հավաքին միացած քաղաքացիների համար մանրամասնեցին՝ կառավարությունն առանց հաշվի առնելու բուհի ուսանողների, դասախոսների կարծիքը, որոշել է միավորել Մանկավարժական ու ֆիզկուլտուրայի համալսարանների հետ, ինչին իրենք ընդդիմանում են, թուլ չեն տալու։

«Կրթության որակը պետք չէ փչացնել, առանց որակյալ կրթության չենք ունենալու նորմալ պետություն, ինչը փորձում են անել»,-ասաց ելույթ ունեցող ուսանողը՝ շնորհակալություն հայտնելով բուհի ռեկտորին, ֆակուլտետների դեկաններին, որոնք այս պայքարում իրենց մենակ չեն թողել։

ԲՊՀ Ֆիզիկական կուլտուրայի և քաղաքացիական պաշտպանության ամբիոնի վարիչ, մ.գ.թ., դոցենտ Էռնեստ Ավանեսովը կոչ արեց ներկաներին չցրվել, քանի որ հետաքրքիր հաղորդագրություններ են ստանում, ուստի հնարավոր է անելիք ունենան։

«Որևէ որոշում առանց մեզ հետ քննարկելու չի լինելու»,-հայտարարեց նա։