Ձեր վստահելի աղբյուրը

«Մենք Արևմուտք-ՌԴ-Իրան բախման էպիկենտրոնում չենք, բայց շատ մոտ ենք։ Իրոք, շատ մոտ ենք և ժամանակը շատ արագ է գալիս դրան։ Խոսքը չի վերաբերում  տարիներին, խոսքն առաջիկա շաբաթների մասին է»,- «Հայկական օրակարգ. Ռուսաստանի և Արևմուտքի բախման կիզակետում» թեմայով պանելային քննարկմանն ասաց Այլընտրանքային նախագծեր խմբի փորձագետ Վահե Հովհաննիսյանը։

Նա նշեց, որ Հայաստանը այս վիճակից գրագետ դուրս գալու խնդիր ունի, հակառակ դեպքում հայտնվելու է նոր, ավելի վտանգավոր՝ օդում կախված վիճակում, որտեղ Արևմուտքը, ՌԴ-ն, Իրանը համարելու են ոչ վստահելի գործընկեր, բոլորը ձեռք են քաշելու, այն ժամանակ հայտվելու է  թուրք-ադրբեջանական բավական գիշատիչ համակարգի առաջ։ Նա խոսքով, այդ գրագետ քայլերը սովորաբար մշակվում են կաբինետներում, փակ, վստահ չէ, որ դա Հայաստանում արվում է։

«Հայաստանի այսօրվա իշխանությունը կառուցված է մեկ հոգուց։ Պետական ինստիտուտները  կազմալուծված վիճակում են։ Չկա ԱԺ, չկա անվտանգության խորհուրդ, նախագահ։ Ի՞նչ կա։ Մեկ հոգի, որը ամենամոտ թիմակիցների հետ չի կիսվում բանակցային  գործընթացի նրբություններից, ինչ է խոսել, ինչ են իրեն ասել։

Դա շատ վտանգավոր է, Հայաստանի իշխանությունը մեկ հոգի է, լուծում է երկու հայկական պետությունների, մեր բոլորի ընտանիքների, երեխաների, գալիք սերունդների ճակատագիրը։ Դա աննորմալություն է։

Աղետը կարող է գալ շաբաթների ընթացքում»,- ասաց Վահե Հովհաննիսյանը՝ ընդգծելով, որ պետությունները սովորաբար աղետներից խուսափում են պետական մտածողությամբ, որի սուր դեֆիցիտ է մեզ մոտ այս պահին։ 

Նա նշեց, որ ցանկացած վերլուծություն անելիս պետք է միշտ հիշել՝ իրական հողի վրա ադրբեջանա-թուրքական ագրեսիային զսպող գործոն  է ՌԴ-ն  իր զորքով Արցախում, Հայաստանում և Իրանը, որը բաց տեքստով  խոսում է սահմանների փոփոխության անթույլատրելիության մասին, մնացածը խաղաղ ժամանակների փիլիսոփայություն է։