Ձեր վստահելի աղբյուրը

ՀԱՊԿ-ը գոհ է ՄԱԿ-ի հակաահաբեկչական կառույցների հետ համագործակցության զարգացման դինամիկայից: «ՌԻԱ նովոստի»-ին հայտնում է, որ այդ մասին հայտարարել է կազմակերպության գլխավոր քարտուղար Ստանիսլավ Զասը։

Երեքշաբթի օրը Դուշանբեում իր աշխատանքն է  սկսել «Միջազգային և տարածաշրջանային համագործակցությունը սահմանների անվտանգության և կառավարման ոլորտում ահաբեկչության դեմ պայքարի և ահաբեկիչների տեղաշարժը կանխելու նպատակով» թեմայով բարձր մակարդակի համաժողովը։ Այն կազմակերպել են ՄԱԿ-ի ահաբեկչության դեմ պայքարի գրասենյակը, Տաջիկստանի կառավարությունը, Կենտրոնական Ասիայի կանխարգելիչ դիվանագիտության տարածաշրջանային կենտրոնը, ԵԱՀԿ-ն և ԵՄ-ն:

«Մենք գոհ ենք ՄԱԿ-ի հակաահաբեկչական գրասենյակի հետ այս ոլորտում մեր համագործակցության զարգացումից,  ինչպես նաև Կենտրոնական Ասիայի կանխարգելիչ դիվանագիտության կենտրոնի հետ սահմանային անվտանգության և վերահսկման ծրագրի շրջանակներում կատարված աշխատանքներից և «Դեպի Համատեղ գործողությունների ծրագրի իրականացում» նախագծից, որն իրականացվում է Կենտրոնական Ասիայում ՄԱԿ-ի ահաբեկչության դեմ պայքարի գլոբալ ռազմավարության համաձայն»,-համաժողովում ունեցած իր ելույթում ասել է Զասը։

Նրա խոսքով՝ ՀԱՊԿ-ը տեսնում է կազմակերպության և ՇՀԿ-ի տարածաշրջանային հակաահաբեկչական կառույցի, ԱՊՀ անդամ երկրների հակաահաբեկչական կենտրոնի և սահմանապահ զորքերի հրամանատարների խորհրդի միջև համագործակցության զարգացման ներուժ՝ Կենտրոնական Ասիայում ահաբեկչական սպառնալիքներին հավաքական հակազդելու համար։