Ձեր վստահելի աղբյուրը

Փաստաբան Էրիկ Ալեքսանյանի ձերբակալման 24-ժամյա ռեժիմը լրացել է, և նա, օրենքի ուժով, ազատ է արձակվել։ Երևանի առաջին ատյանի ընդհանուր իրավասության դատարանը, դատավոր Արշակ Մաթևոսյանի նախագահությամբ, շարունակում է քննել ԱԱԾ միջնորդությունը փաստաբան Էրիկ Ալեքսանյանի նկատմամբ կալանքը որպես խափանման միջոց կիրառելու վերաբերյալ։

Լրագրողների հետ զրույցում Է. Ալեքսանյանն ասաց. «Լուրեր են պտտվում, թե  ինձ կաշառքի հետ կապված մեղադրանք է առաջադրվել։ Նշեմ, որ իրականությանը չի համապատասխանում, կաշառքի մեղադրանքի մասին խոսք չի գնում, չի էլ կարող գնալ։ Ինձ բոլոր ճանաչող մարդիկ շատ լավ գիտեն, որ որևէ կոռուպցիոն հանցագործության մեջ չեմ  կարող ներգրավված լինել ՝ հաշվի առնելով կոնկրետ իմ անձը։  Հասկանում եմ,  որ որոշակի մարդկանց  շրջանակ միգուցե սպասում էին կամ ենթադրում էին կամ ցանկանում էին, որպեսզի Էրիկ Ալեքսանյանը որևէ նման գործում  ներգրավված լինի, բայց՝  ապարդյուն»։

Ինչ վերաբերում է մեղադրանքին, նա նշեց, որ, բնականաբար, կաշկանդված է նախաքննության գաղտնիքով, բայց նվազագույն տվյալները հայտնեց. «Մեղադրանքը  վերաբերվում է՝  իբրև  ես օժանդակել եմ պաշտոնատար անձին, տվյալ պարագայում դատավոր Արուսյակ Ալեքսանյանին, որպեսզի  վերջինս չարաշահի իր լիազորությունները։ Օժանդակությունը, ըստ էության,  կապում են իմ կողմից իմ մասնագիտական գործունեություն ծավալելը, որոշակի դատավարական գործողություններ ներկայացնելը»։

Լրագրողի ճշտող հարցին՝ գրավով ազատ արձակման մասի՞ն է հարցը, Է.Ալեքսանյանը պատասխանեց. «Փաստորեն, ինձանից շատ լավ գիտեք»։

Այնուհետև շարունակեց. «Մեղադրանքը չեմ ընդունում, այն հորինված է, արտացոլված որևէ… չեմ կարող ասել փաստ, նույնիսկ չեմ կարող բնորոշել որպես փաստարկ, կարող եմ բնորոշել բացառապես որպես մերկապարանոց հայտարարություն, որ ես այդ հանգամանքների հետ որևէ առնչություն եմ ունեցել»։

Նա նշեց, որ հանրությանը որպես փաստաբան, հայտնի է որպես բազմաթիվ հնչեղ քրեական գործերով պաշտպանություն իրականացնող անձ, միաժամանակ որևէ մեկի համար գաղտնիք չէ, որ  բազմաթիվ անգամներ, այդ քրեական գործերի շրջանակներում, օբյեկտիվ հիմք ունենալով հանդես է եկել նաև սուր քննադատություններով։

«Հավատացեք, եթե հայտնվել եմ այս աթոռին, եթե որևէ որևէ մեկը մտածում է  նման  օբյեկտիվ հիմք ունենալու հետագայում պարագայում այս հանգամանքն ինձ կկաշկանդի նաև որոշակի քննադատություններ անել, չարաչար բոլորը սխալվում են, քանի որ սա  ոչ այլ ինչ է, քան իմ մասնագիտական  գործունեությանը միջամտելը, ինձ լռեցնելու փորձ է։ Մի բան հստակ ասեմ՝ եթե իրենց միջոցը, եղանակը, այդ գործողության կատարումն, ինձ մեղադրանք առաջադրելն է, կալանավորելն է, ապա իրենք սխալվել են։

Կալանավորվելուց չեմ վախենում, քննության ընթացքում կապացուցեմ ինքս, որ ես ոչ միայն մեղավոր չեմ, այլ նաև որևէ առնչության չունեմ այն, ինչ ինձ վերագրվում է»,- ասաց Ալեքսանյանը։

Նա մանրամասնեց, որ մեղադրանքի բուն էությունը կայանում է նրանում, որ ներկայացրել է համապատասխան միջնորդություններ այլ խափանման միջոցի կիրառումը թույլատրելի ճանաչելու մասին, դրանով իսկ օժանդակել է ենթադրաբար հանցավոր մտադրություն ունենալով պաշտոնատար անձի կողմից, այդ վարույթի շրջանակներում ապօրինի գործողություն կատարելը՝ ակնհայտ անարդար ապօրինի դատական ակտ կայացնելը։