Ձեր վստահելի աղբյուրը

«Մեր քննարկումների առանցքային թեման տարածաշրջանի անվտանգությանը և կայունության վերաբերող  իրավիճակն է։ Գործընկերողջ ներկայացրել եմ Հայաստանի և Ադրբեջանի միջ խաղաղության պայմանագրի մշակման մանրամասները։ Անդրադարձել եմ նաև սեպտեմբերի 13-14-ին Ադրբեջանի կողմից ՀՀ ինքնիշխանության և տարածքային ամբողջականության դեմ սանձազերծած ագրեսիայի մանրամասներին և հետևանքներին» ,- պաշտոնական այցով Երևանում գտնվող  ԻԻՀ ԱԳ նախարար Հոսեյն Ամիր Աբդոլլահիանի հետ համատեղ մամուլի ասուլիսի ընթացքում ասաց ՀՀ ԱԳ նախարար Արարատ Միրզոյանը։

Նրա համոզմամբ՝ տարածաշրջանային խնդիրները պետք է լուծվեն բանակցությունների և կառուցողական երկխոսության միջոցով՝ բացառելով ուժի կիրառումը։

«Մենք բարձր ենք գնահատում բարեկամ Իրանի սկզբունքային և հստակ դիրքորոշումը՝ ՀՀ տարածքային ամբողջականության վերաբերյալ, ինչպես նաև  տարածաշրջանում կայունությանն ու խաղաղությանն ուղղված իրանական կողմի ջանքերը։ Գործընկերոջս հետ քննարկել ենք, ինչպես երկկողմ, այնպես էլ՝ բազմակողմ հարթակներում փոխգործակցությանն առնչվող հարցեր և պատրաստակամություն ենք հայտնել համատեղ ջանքերով հարստացնել հայ-իրանական հարաբերությունները»,- ընդգծեց Միրզոյանը։
Միրզոյանը նշեց, որ կարևորել են հատկապես տնտեսական համագործակցությունը․

«Պարսից ծոց-Սև ծով» միջազգային տրանսպորտային միջանցքի ծրագրի իրագործման կարևորությունը, որը կարող է ընդգրկել նաև այլ շահառու և հետաքրքրված կողմեր և երկրներ»։

Պատասխանելով իրանցի լրագրողի հարցին՝ կապված Պրահայում Ադրբեջանի ներկայացուցչի հետ հանդիպմանն ու   ձեռք բերված պայմանավորվածություններին, Միրզոյանն ասաց․

««Խաղաղության պայամանգրի», նաև Հայաստան-Ադրբեջան առկա մյուս խնդիրների, այդ թովում՝ ԼՂ հիմնախնդրի շուրջ մեր հանդիպումները շարունակական են տարբեր հարթակներում և տարբեր ֆորմատներով։ Ամենուր փորձում ենք կառուցողական լինել և գտնել փոխադարձ ընդունելի լուծումներ։ Մեծ առաջընթացներ ունենալու հիմնական խոչընդոտն Ադրբեջանի  առավելապաշտական, մաքսիմալիստական մոտեցումն է և Հայաստանի հետ փոխադարձ ընդունելի լուծումների գնալու դժկամությունը։ Հուսով ենք, որ այս խոչընդոտն առաջիկայում կհաղթահարվի»։

Որոշ ժամանակ անց այս հարցի հետ կապված Միրզոյանն ավելացում արեց․ «Երբ խաղաղ բանակցություններ վարելիս շարունակաբար հնչեցում են ուժի գործադրման սպառնալիքներ կամ իրականության մեջ այդ ուժը գործադրվում է, սա խաղաղության ձգտման լավագույն ձևը, օրինակը և ապացույցը չէ»։

 Մեկ այլ իրանցի լրագրող էլ Միրզոյանից կարծիք հարցրեց՝ Ադրբեջանին և Նախիջևանին կապող միջանցքի կառուցման մասին։

«Կարծում եմ՝ հարցի ձևակերպման մեջ որոշակի սխալ կար։ 2020թ․-ի Ադրբեջանի ագրեսիայից հետո եռակողմ հայատարարություններ կան, որոնցով դադարեցվեցին ռազմական գործողությունները, նաև ընդգծվում են  տարածաշրջանի տրանսպորտային և տնտեսական ենթակառուցվածքների ապաշրջափակման կարևորությունը և այս բոլոր ենթակառուցվածքների  ապաշրջափակման համատեքստում նաև ընդգվում են Ադրբեջանի հիմնական մասի և Նախիջևանի միջև տրանսպորտային հաղորդակցության հաստատումը։ Մենք եռակողմ աշխատանքային խմբի ֆորմատում մասնակցում ենք քննարկումներին և մենք պատրաստ ենք բացել ճանապարհները նաև ադրբեջանական ուղևորափոխադրումների և բեռնափոխադրումների համար՝ ամրագրելով  և կասկածի տակ չդնելով, որ բոլոր  բացվելիք կամ նոր կառուցվելիք ենթակառուցվածքները պետք է մնան այն երկրների սուվերենության ներքո և գործեն այն երկրների օրենդրության համաձայն, որոնց տարածքով անցնում են։  Հիմնական պահանջը հետևյալն է՝ ճանապարհները պետք է մնան մեր սուվերենության և գործեն մեր օրենսդրության ներքո։ Ցավոք, մենք հանդիպում ենք Ադրբեջանի անզիջում վարքագծին և կարող եմ ասել, որ այլ երրորդ երկրներ, երբեմն անսպասելի երկրներ, աջակցում են այս ճանապարհի Ադրբեջանի ինտերպրետացիային»,- ասաց Միրզոյանը։

Ավելի վաղ տեղի ունեցավ պաշտոնական այցով Երևանում գտնվող  ԻԻՀ ԱԳ նախարար Հոսեյն Ամիր Աբդոլլահիանի և Արարատ Միրզոյանը հանդիպումը։

Նշենք, որ այցի ընթացքում ԻԻՀ ԱԳ նախարարը հանդիպումներ կունենա նաև Նիկոլ Փաշինյանի և   Ալեն Սիմոնյանի հետ:

Հոկտեմբերի 21-ին ՀՀ ԱԳ նախարար Արարատ Միրզոյանը և ԻԻՀ ԱԳ նախարար Հոսեյն Ամիր Աբդոլլահիանը ներկա կլինեն Կապանում ԻԻՀ գլխավոր հյուպատոսության բացման հանդիսավոր արարողությանը: