Ձեր վստահելի աղբյուրը

«Մեր ներկայությունը Երևանում վկայում է Հայաստանի և Իրանի միջև բազմադարյա բարեկամական հարաբերությունը։ Այսօր բովանդակալից առանձնազրույց ունեցանք գործընկերոջս հետ»,- ՀՀ ԱԳՆ-ում տեղի ունեցող մամուլի ասուլիսի ընթացքում ասաց պաշտոնական այցով Երևանում գտնվող  ԻԻՀ ԱԳ նախարար Հոսեյն Ամիր Աբդոլլահիանը։

Անդրադառնալով երկու երկրների միջև տնտեսական համագործակցության հնարավորություններին, ԻԻՀ ԱԳ նախարարն ասաց․

«Երկու երկրների միջև առևտրաշրջանառությունը մոտավորապես 2 մլն-ի կարգի է և համաձայնեցինք հասնել մինչև մեկ միլիարդի»։

Նա նշեց, որ Հայաստանն ու Իրանն ունեն տնտեսական պոտենցիալը բարձրացնելու հնարավորություն, նույնիսկ՝ մեկ մլդ-ից։ Հոսեյն Ամիր Աբդոլլահիանը իր ելույթում կարևորեց ճանապարհների հարցը՝ նշելով․

«Կապանում Իրանի հյուպատոսության բացումն այն կարևոր աշխատանքներից է, որը պետք է իրականացնենք վաղը։ Ունենք համատեղ շահեր, կարծիքներ, նաև մտահոգություններ, որոնք առկա են տարածաշրջանում։ Իրանական կողմը դեմ է, որպեսզի տարածաշրջանում ներկա լինեն օտարերկրյա ներկայացուցիչներ։ Տարածաշրջանում կարևորում ենք  ներքին ներկայացուցիչների գործունեությունը, ինչպես՝ 3+3 պլատֆորմը։ Իրանական կողմը աշխարհագրական առումով տարածաշրջանում պատմական սահմանների փոփոխություն չի ընդունելու, դա մեր «կարմիր գիծն» է։ Կձեռնարկենք բոլոր քայլերը՝ դիմակայելու  նման մտայնություններին»։

ԻԻՀ ԱԳ նախարարը պատասխանելով «Արմենպրես»-ի հարցին՝ կապված «Պարսից ծոց-Սև ծով միջազգային տրանսպորտային միջանցքի ծրագրի հեռանկարին և դրանում հնարավոր այլ երկրների մասնակցությանը, ասաց․

«Այս միջանցքը մեր օրակարգի կարևոր թեմաներից է։ Համակարծիք ենք եղել այն բանի հետ, որ հաշվի առնելով Հնդկաստանի դերակատարությունը և այն դերը, որ նա կարող է ունենալ այս միջանցքում, ձևակերպել եռակողմ հանդիպում Հայաստանի, Իրանի և Հնդկաստանի միջև,որպեսզի կարողանանք իրականացնել այս ճանապարհի հետ կապված մեր նպատակները»։

 
Մեկ այլ հարցին, կապված Ադրբեջանի ռազմատենչ հայտարարությունների և շարունակող ագրեսիվ գործողությունների համատեքստում որն է լինելու  այս իրավիճակում իրանական կողմի դերակատարությունը, ԻԻՀ ԱԳ նախարարն պատասխանեց․

«Ադրբեջանի նախագահը, մեր երկրի պաշտոնական ղեկավարների հետ հանդիպման ընթացքում, հստակորեն նշել է, որ նման մտադրություններ չունեն՝ և՛ աշխարհագրական, և՛ սահմանային փոփոխություն տարածաշրջանում չեն հետապնդում և չեն ցանկանում իրականացնել։ Մենք ամենաբարձր մակարդակներում տարածաշրջանի աշխարհաքաղաքական և սահմանների փոփոխությունների հետ կապված համապատասխան զգուշացումներ արել ենք։ ԻԻՀ-ն հնարավորություն ունի խոչընդոտելու և դիմակայելու՝ ցանկացած նման գաղափարի»։

Ավելի վաղ տեղի ունեցավ պաշտոնական այցով Երևանում գտնվող  ԻԻՀ ԱԳ նախարար Հոսեյն Ամիր Աբդոլլահիանի և Արարատ Միրզոյանը հանդիպումը։

Նշենք, որ այցի ընթացքում ԻԻՀ ԱԳ նախարարը հանդիպումներ կունենա նաև Նիկոլ Փաշինյանի և   Ալեն Սիմոնյանի հետ:

Հոկտեմբերի 21-ին ՀՀ ԱԳ նախարար Արարատ Միրզոյանը և ԻԻՀ ԱԳ նախարար Հոսեյն Ամիր Աբդոլլահիանը ներկա կլինեն Կապանում ԻԻՀ գլխավոր հյուպատոսության բացման հանդիսավոր արարողությանը: